ءبىلىم جانە عىلىم ءمينيسترى اسحات ايماعامبەتوۆ پرەزيدەنت قاسىم-جومارت توقايەۆتىڭ "جاڭا جاعدايداعى قازاقستان ءىس-قيمىل كەزەڭى" اتتى جولداۋىندا ءبىلىم جانە عىلىم سالالارىن دامىتۋ تۋرالى تاپسىرمالارىن ىسكە اسىرۋدى باستاعانىن اتاپ ايتتى.
– 6 جاسقا دەيىنگى بالالاردى بالاباقشامەن 100 پايىز قامتاماسىز ەتۋ 2025 جىلعا قاراي كەزەڭ كەزەڭمەن ىسكە اسىرىلادى. مۇنى جەكەمەنشىك بالاباقشالاردىڭ ۇلەسىن كوبەيتۋ ارقىلى ورىندايمىز. قازىرگى جاعدايدا قاي بالاباقشا مەملەكەتتىك تاپسىرىستى الاتىنىن اۋدان، قالا، ءبىلىم بولىمدەرى شەشسە، ال بۇدان كەيىن اتا-انالاردىڭ ءوزى ۆاۋچەرلىك قارجىلاندىرۋ ارقىلى شەشەتىن بولادى. ناقتى ءبىر بالانى بالاباقشاعا كەزەگى كەلگەندە اتا-اناسى ۆاۋچەردى الىپ ءوزى قالاعان بالاباقشاعا بەرەدى. بۇل باسەكەلەستىكپەن قاتار ساپانى كوتەرەدى، – دەدى ول.
مينيستر ورتا ءبىلىم بويىنشا ءبىرقاتار جۇمىستاردى اتاپ ءوتتى.
– قاشىقتان وقىتۋ اياسىندا وتاندىق نارىققا 8-دەن استام ءبىلىم بەرۋ پلاتفورماسى شىعۋدا. ءبىراق پلاتفورمالاردىڭ فۋنكسيونالى مەن مۇمكىندىكتەرى ءار ءتۇرلى. مينيسترلىك وقىتۋ پروسەسىن تولىققاندى ىسكە اسىرۋ ءۇشىن قاجەتتى فۋنكسيونالدى الۋعا مۇمكىندىك بەرەتىن ونلاين پلاتفورما قويىلاتىن ءبىرىڭعاي تالاپتاردى ازىرلەپ، ىسكە اسىراتىن بولادى. ءبىلىم بەرۋ ۇيىمدارىنىڭ وقىتۋدىڭ ءداستۇرلى كۇندىزگى فورماتىنا قايتارۋدىڭ ءتيىستى ءتارتىبى دەنساۋلىق ساقتاۋ مينيسترلىگىمەن بىرگە ازىرلەنەدى.
پرەزيدەنتتىڭ مۇعالىمدەردىڭ جالاقىسىن 2021 جىلى 1-قاڭتاردان باستاپ 25 پايىزعا ارتتىرۋ تاپسىرماسى بويىنشا ءتيىستى قاراجات بيۋدجەت جوباسىندا تولىعىمەن قاراستىرىلدى. بۇعان قوسا مەملەكەت باسشىسىنىڭ تاپسىرماسى اياسىندا قىركۇيەك ايىنان باستاپ داپتەر تەكسەرۋشىنىڭ ۇستەماقىسى 2 ەسەگە، سىنىپ جەتەكشى ءۇشىن الاتىن ۇستەماقى 2 ەسەگە، ماگيستر دارەجەسى بار مۇعالىمدەر 27 مىڭ تەڭگە كولەمىندە جاڭا ۇستەماقى الاتىن بولادى، – دەدى ۇكىمەت وتىرىسىندا اسحات ايماعامبەتوۆ.
پىكىر قالدىرۋ