قازاقستاندا زەينەتاقىنىڭ ورتاشا مولشەرى 94 913 تەڭگەنى قۇرايدى، دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى.

ۆەدومستۆونىڭ مالىمەتىنشە، 2020 جىلعى قاڭتار-قىركۇيەك ايلارىندا رەسپۋبليكالىق بيۋدجەتتەن بازالىق زەينەتاقى تولەۋگە 576، 4 ملرد تەڭگە، ىنتىماقتى زەينەتاقى تولەمدەرىنە – 1 ترلن 285، 4 ملرد تەڭگە باعىتتالدى.

"2020 جىلعى قىركۇيەك ايىندا رەسپۋبليكالىق بيۋدجەتتەن زەينەتاقى تولەمدەرىنە 209 ملرد تەڭگە، ونىڭ ىشىندە بازالىق زەينەتاقى تولەۋگە – 64، 8 ملرد تەڭگە، ىنتىماقتى زەينەتاقى تولەۋگە – 144، 2 ملرد تەڭگە ءبولىندى.

2020 جىلعى 1 قازانداعى جاعداي بويىنشا زەينەتكەرلەر سانى 2 ملن 212 مىڭ ادامدى قۇرايدى. زەينەتاقى تولەمدەرىنىڭ ورتاشا مولشەرى (ونىڭ ىشىندە بازالىق زەينەتاقى) 2020 جىلعى 1 قازانداعى جاعداي بويىنشا 94 913 تەڭگەنى قۇرادى.

ەسكە سالايىق، 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى، ونىڭ زەينەتاقى جۇيەسىندەگى تاجىريبەسىن ەسكەرە وتىرىپ، ءار الۋشىعا جەكە تاعايىندالادى. بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر (بۇدان ءارى - مزج) زەينەتاقى جۇيەسىندەگى ەڭبەك وتىلىنە قوسىلادى" دەلىنگەن ۆەدومستۆونىڭ حابارلاماسىندا.

مينيسترلىكتىڭ ايتۋىنشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

"سونىمەن، ەگەر زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى، سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى، ەگەر ءسىز 20 جىل قاتىسساڭىز، بازالىق زەينەتاقى كۇنكورىس دەڭگەيى قۇنىنىڭ 74%-دى، 30 جىل – كۇنكورىس قۇنىنىڭ 94%-ىن قۇرايدى. 33 جانە ودان دا كوپ جىل جۇمىس ءوتىلى بولسا، كۇنكورىس قۇنىنىڭ 100% جوعارى مولشەرىندە بەلگىلەنەدى.

ەگەر ءبىر اي ىشىندە مزج بىرنەشە رەت ءبىرىڭعاي جيناقتاۋشى زەينەتاقى قورىنا جاسالسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى. وسىلايشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، زەينەتاقى جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.

جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدە الىنعان ورتاشا ايلىق تابىسقا بايلانىستى بولادى" دەلىنگەن حابارلامادا.