اتىراۋ وبلىسىنىڭ توتەنشە جاعداي دەپارتامەنتى 10 قازاندا كاسپيي جاعالاۋىنداعى باتپاقتى جەردە قۇرعاق ءشوپ پەن قامىس ورتەنگەنىن حابارلادى، دەپ جازادى azh.kz  سايتى.

– ءورتتىڭ ىشىندە "ۆاز-21214" كولىگى مەن "فرەگات" رەزەڭكە قايىعى تۇگەلدەي جانىپ كەتكەن. ءورت ورنىنا ەكى تەحنيكا – اۆتوسيستەرنا مەن جول تالعامايتىن "ترەكول"، سونداي-اق تجد 11 قىزمەتكەرى شىقتى. كۇن باتقاسىن ءورت ءسوندىرۋ جۇمىستارىن ۋاقىتشا توقتاتۋعا تۋرا كەلدى، سەبەبى باتپاقتى جەرمەن قوزعالۋعا مۇمكىن بولمادى. ءورت اۋماعى انىقتالۋدا. ءورت تەڭىزگە قاراي بەتتەدى، ەلدى مەكەندەرگە ءقاۋىپ ءتونىپ تۇرعان جوق، – دەلىنگەن وبلىستىق دەپارتامەنت حابارلاماسىندا. 

ءورت سالدارىنان 11 قازاندا اتىراۋدىڭ تۇرعىندارى اۋادان كۇيىكتىڭ ءيىسىن بايقاپ، قالانىڭ كەي جەرلەرىن ءتۇتىن باسقان. جاعىمسىز ءيىس پەن اسپاننىڭ تۇنەرىپ كەتكەنىنە، اسىرەسە، دامبى اۋىلدىق وكرۋگىنىڭ تۇرعىندارى كوپ شاعىمدانعان.

جولاۋشىلار ۇشاعىنان تۇسىرىلگەن بەينەجازبادا ءورتتىڭ اۋقىمى ۇلكەن ەكەنى بايقالادى. 

بۇعان دەيىن، قىركۇيەك ايىندا تەڭىز جاعالاۋىندا قامىس ورتەنگەن بولاتىن. ول كەزدە شىمكەنتتەن ارنايى جەتكىزىلگەن تىكۇشاق ءورت وشاعىنا 10 رەت 3 توننادان سۋ سەپكەن. ءدال وسىنداي جاعداي اتىراۋدا ءبىر جىل بۇرىن بولدى: "اقجايىق" رەزەرۆاتىندا قامىس ورتەنىپ، بۇكىل اتىراۋدى ءتۇتىن باسىپ كەتكەن ەدى.