مەملەكەت باسشىسى قاسىم-جومارت توقايەۆ ەمومالي راحموندى تاجىكستان رەسپۋبليكاسىنىڭ پرەزيدەنتى بولىپ قايتا سايلانۋىمەن قۇتتىقتادى، دەپ حابارلادى اقوردا سايتى.
سايت مالىمەتىنشە، توقايەۆ ە.راحموندى تاجىكستاننىڭ پرەزيدەنتى بولىپ قايتا سايلانۋىمەن قۇتتىقتادى. سايلاۋ قورىتىندىلارى ونىڭ ستراتەگيالىق باعىتىنا دەگەن جوعارى سەنىم مەن بۇكىلحالىقتىق قولداۋدىڭ بەلگىسى ەكەنىن اتاپ ءوتتى.
اڭگىمەلەسۋ بارىسىندا مەملەكەت باسشىسى تاجىكستان پرەزيدەنتىنىڭ ەكى ەل اراسىنداعى بەرىك دوستىق بايلانىستاردى جانە ستراتەگيالىق ارىپتەستىكتى دامىتۋعا زور ۇلەس قوسقانىن ايتتى.
"قازاقستان پرەزيدەنتى باۋىرلاس ەكى حالىقتىڭ مۇددەسى جولىندا كۇش-جىگەر بىرىكتىرۋ ارقىلى كوپجاقتى قازاق-تاجىك ىنتىماقتاستىعى جاڭا بەلەستەرگە كوتەرىلەتىنىنە سەنىم ءبىلدىردى.
تاراپتار ەكىجاقتى كۇن تارتىبىندەگى بارلىق ماسەلە بويىنشا بىرلەسكەن جۇمىستى بەلسەندى جالعاستىرۋعا دايىن ەكەنىن راستادى. قاسىم-جومارت توقايەۆ ستراتەگيالىق سەرىكتەستىكتى نىعايتۋ جانە قازاق-تاجىك قاتىناستارىنا تىڭ سەرپىن بەرۋ ماقساتىندا ەمومالي راحموندى وزىنە ىڭعايلى كەز-كەلگەن ۋاقىتتا قازاقستانعا رەسمي ساپارمەن كەلۋگە شاقىردى" دەلىنگەن حابارلامادا.
پىكىر قالدىرۋ