ءبىلىم جانە عىلىم مينيسترلىگى شىمكەنت قالاسىنداعى تاعى ءبىر جوعارى وقۋ ورنى – اكادەميك ا.قۋاتبەكوۆ اتىنداعى حالىقتار دوستىعى ۋنيۆەرسيتەتىن باس ليسەنزياسىنان ايىردى.
مينيسترلىك سايتتىڭ حابارلاۋىنشا، شەشىم جوعارى وقۋ ورنىندا ءبىلىم بەرۋ سالاسىنداعى زاڭنامانىڭ ساقتالۋى بويىنشا بىرنەشە رەت وتكەن تەكسەرۋدەن كەيىن قابىلدانعان.
– ءبىز ستۋدەنتتەر مەن اتا-انالاردىڭ مۇنداي شارالار، ەڭ الدىمەن، ستۋدەنتتەردىڭ وزدەرىنىڭ مۇددەلەرىن ەسكەرە وتىرىپ، قابىلداناتىنىن تۇسىنگەنىن قالايمىز. ەگەر جوعارى وقۋ ورىندارى ءبىلىم بەرۋ سالاسىنداعى تالاپتارعا سايكەس كەلمەسە، ديپلوم العاننان كەيىن بولاشاق ماماندار جۇمىسقا ورنالاسۋ پروبلەمالارىنا تاپ بولۋى مۇمكىن، – دەدى بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
ورىن العان زاڭ بۇزۋشىلىقتار وقۋ ۇدەرىسىن ۇيىمداستىرۋ، تالاپكەرلەردى وقۋعا قابىلداۋ، جوو-نى وقۋ-ادىستەمەلىك جانە عىلىمي ادەبيەتتەرمەن قامتاماسىز ەتۋ، تۇلەكتەردى جۇمىسقا ورنالاستىرۋ توڭىرەگىندە بولعان.
مينيسترلىكتىڭ مالىمەتىنشە، ستۋدەنتتەر وقۋ سەمەسترىنىڭ اياقتالعانىن كۇتپەي-اق باسقا جوو-لارعا اۋىسا الادى. ستۋدەنتتەردىڭ بارلىق وقۋ كورسەتكىشتەرى باسقا جوو-لارعا اۋىسقان كەزدە جارامدى بولادى. اقىلى نەگىزدە وقيتىندار ءۇشىن وقۋ قۇنى بۇرىنعى دەڭگەيدە قالادى. ءبىلىم جانە عىلىم مينيسترلىگى ءوز تاراپىنان كومەكتەسەدى.
سونىمەن قاتار بۇل شەشىم شىمكەنت قالاسىنىڭ مامانداندىرىلعان اۋدانارالىق اكىمشىلىك سوتى وتىرىسىنىڭ قورىتىندىسى بويىنشا شىعارىلدى، 10 جۇمىس كۇنى ىشىندە زاڭدى كۇشىنە ەنەدى. وسى كەزەڭدە اكادەميك ا. قۋاتبەكوۆ اتىنداعى حالىقتار دوستىعى ۋنيۆەرسيتەتى سوت شەشىمىنە دە، مينيسترلىككە دە شاعىمدانۋعا قۇقىلى.
