بەلارۋستە جەكسەنبى كۇنى الەكساندر لۋكاشەنكو رەجيمىنە قارسى رۇقسات ەتىلمەگەن نارازىلىق اكسيالارى ءوتتى. بۇل تۋرالى ria.ru حابارلادى.
وتكەن جەكسەنبىدە (29 قاراشادا) مينسك پەن بەلارۋستىڭ وزگە قالالارىندا ادەتتەگىدەي نارازىلىق اكسياسى ءوتتى. قالالىق ىشكى ىستەر باسقارماسى دەمونسترانتتاردىڭ كوشەگە "تىركەلمەگەن سيمۆوليكا جانە پلاكات" ۇستاپ شىققانىن ايتىپ، جول قوزعالىسىنا كەدەرگى كەلتىرگەنىن العا تارتقان.
"ۆەسنا" قۇقىق قورعاۋ ورتالىعىنىڭ مالىمەتىنشە، نارازىلىق شەرۋگە شىققان 384 ادام ۇستالدى. مينسك پوليسياسى جەكسەنبىدە 250-گە جۋىق ادام رۇقسات ەتىلمەگەن نارازىلىق اكسياسىنا قاتىسقانى ءۇشىن ۇستالعانىن حابارلادى.
جەكسەنبى تاڭەرتەڭ مينسكىدە بيلىك قالا ورتالىعىنداعى وننان استام مەترو ستانسياسىن جاۋىپ، ءموبيلدى ينتەرنەتتى وشىرگەن.
بەلارۋس وپپوزيسياسى ءداستۇرلى تۇردە جەكسەنبىدە مينسكىدە شەرۋ فورماتىندا نارازىلىق اكسيالارىن وتكىزەدى. بۇل جولى مينسكىدە وپپوزيسيا جاقتاستارى قالانىڭ ءارتۇرلى اۋداندارىندا جەرگىلىكتى ميتينگتەرگە كولوننا بولىپ جينالدى، قاۋىپسىزدىك كۇشتەرى ولارعا كەدەرگى كەلتىرىپ، ادامداردى ۇستاپ اكەتىپ وتىرعان.
9 تامىزدا وتكەن پرەزيدەنت سايلاۋىنان كەيىن الەكساندر لۋكاشەنكو التىنشى رەت جەڭىسكە جەتتى، ول وسك مالىمەتتەرى بويىنشا 80،1% داۋىسقا يە بولعان. سايلاۋ ناتيجەسىمەن كەلىسپەگەن وپپوزيسيا سودان بەرى تۇراقتى تۇردە جاپپاي نارازىلىق اكسيالارىن وتكىزىپ كەلەدى. وپپوزيسيا سۆەتلانا تيحانوۆسكايا جەڭدى دەپ سانايدى. نارازىلىق بىلدىرۋشىلەرگە قارسى ارەكەتتەردى تاراتۋ كەزىندە قاۋىپسىزدىك كۇشتەرى كوزدەن جاس اعىزاتىن گاز، سۋ اتقىش، گراناتالار، رەزەڭكە وقتار قولداندى. نارازىلىق اكسياسى ءالى جالعاسۋدا.
پىكىر قالدىرۋ