تاۋەلسىزدىك كۇنى قارساڭىندا ءماجىلىس ءتوراعاسى نۇرلان نىعماتۋلين دەپۋتاتتارعا جانە اپپارات قىزمەتكەرلەرىنە پرەزيدەنت جارلىعىمەن بەرىلگەن مەملەكەتتىك ماراپاتتاردى تاپسىردى.
نۇرلان نىعماتۋلين تاۋەلسىزدىك كۇنىنىڭ بارلىق قازاقستاندىقتار ءۇشىن ماڭىزدىلىعى، ەلىمىزدىڭ وسى جىلدارداعى جەتىستىكتەرى تۋرالى ايتىپ:
-تۇڭعىش پرەزيدەنتىمىز، ەلباسى نۇرسۇلتان ءابىش ۇلى نازاربايەۆتىڭ كەمەل ساياساتىنىڭ ارقاسىندا بۇكىل الەمگە جەدەل دامۋشى ەل رەتىندە تانىمال بولدىق. زامانعا ساي ءبىلىمدى، رۋحتى ۇرپاقتارىمىز ءوسىپ كەلەدى، - دەدى.
سونداي-اق، پالاتا سپيكەرى قازاقستانىمىز دۇنيەجۇزىنىڭ ساياساتكەرلەرى، وركەنيەتتى ەل باسشىلارى، الەمدىك قايراتكەرلەر باس قوساتىن سىيلى شاڭىراققا اينالعانىن، بۇگىنگى كۇنى مەملەكەت باسشىسى قاسىم-جومارت كەمەل ۇلى توقايەۆ وسى تولاعاي تابىستارىمىزدى ساقتاپ، ستراتەگيالىق دامۋ باعىتىن ودان ءارى جالعاستىرىپ جاتقانىنا نازار اۋداردى.
نۇرلان نىعماتۋلين دەپۋتاتتىق كورپۋستىڭ ەلىمىزدى ودان ءارى جاڭعىرتۋ بويىنشا ەلباسى مەن مەملەكەت باسشىسى قويعان بارلىق مىندەتتەردىڭ ورىندالۋىن زاڭنامالىق تۇرعىدان قامتاماسىز ەتۋ ءۇشىن قازىرگى كۇردەلى جاعدايدا جۇمىستىڭ جاڭا نىساندارى مەن مەحانيزمدەرىن ەنگىزگەنىن اتاپ ءوتتى.
مەملەكەتتىك جانە قوعامدىق قىزمەتى ءۇشىن، ەلىمىزدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى ىنتىماقتاستىق پەن دوستىقتى نىعايتۋعا قوسقان ەلەۋلى ۇلەسى ءۇشىن ءىىى دارەجەلى «بارىس» وردەنى ءماجىلىس دەپۋتاتى ومارحان وكسيكبايەۆقا بەرىلسە، «پاراسات» وردەنى جەكسەنباي دۇيسەبايەۆقا جانە دانيا ەسپايەۆاعا تابىس ەتىلدى. «قۇرمەت» وردەنى جامبىل احمەتبەكوۆ يە بولدى. ال، «ەرەن ەڭبەگى ءۇشىن» مەملەكەتتىك مەدالى اپپارات قىزمەتكەرلەرى ناريمان العوجينگە، بوتاگوز بوتابايەۆاعا جانە كلارا ماۋتەنبايەۆاعا بەرىلدى.
قازاقستان رەسپۋبليكاسىنىڭ قۇرمەت گراموتاسى اپپارات قىزمەتكەرلەرى ايتبەك ءالىپوۆ، ايگەرىم نۇرجانوۆا جانە تاتيانا سىزدىقوۆاعا تابىستالدى.
سونىمەن قاتار ءماجىلىس ءتوراعاسى تمد پارلامەنتارالىق اسسامبلەياسىنىڭ «دوستىق» وردەنىن باس پروكۋروردىڭ ورىنباسارى مارات احمەتجانوۆقا، تمد پارلامەنتارالىق اسسامبلەياسىنىڭ «پارلامەنتارالىق ىنتىماقتاستىقتى نىعايتۋ ءۇشىن» مەدالى ادىلەت ءمينيسترى مارات بەكەتايەۆقا جانە ءماجىلىس دەپۋتاتى سەرگەي زۆولسكييگە بەرىلدى. تمد پارلامەنتارالىق اسسامبلەياسىنىڭ قۇرمەت گراموتالارىن ءابدىماناپ بەكتۇرعانوۆ پەن مۇحتار ەرمان الدى.
ءىس-شارا بارىسىندا پالاتا سپيكەرى نۇرلان نىعماتۋلين زاڭ جوبالارىمەن ءتيىمدى جۇمىس ىستەۋ جانە پارلامەنتارالىق بايلانىستاردى كەڭەيتۋ ءۇشىن مەملەكەتتىك ورگاندار وكىلدەرىنىڭ دەپۋتاتتىق كورپۋسپەن ءوزارا ءىس-قيمىلىنىڭ ماڭىزدىلىعىن اتاپ ءوتتى.
سونداي-اق، مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىنا ءماجىلىس دەپۋتاتى ساۋىتبەك ابدراحمانوۆ «ابىز ءابىش» زەرتتەۋى ءۇشىن يە بولدى.
پىكىر قالدىرۋ