پرەزيدەنت قاسىم-جومارت توقايەۆ ەگەمەن قازاقستان گازەتىندە جاريالانعان "تاۋەلسىزدىك بارىنەن قىمبات" ماقالاسىندا بۇگىنگى جانە بولاشاق ۇرپاق جاڭا سىن-قاتەرلەرگە دايىن بولۋى كەرەگىن ايتتى.

– الداعى ءتورتىنشى ونجىلدىقتىڭ بىزگە جۇكتەيتىن مىندەتى – قۋاتتى ەلدىڭ يەسى جانە كەمەل حالىق بولۋ. بۇل جولدا ساياسي-ەكونوميكالىق رەفورمالاردى جانە سانانى جاڭعىرتۋ ۇدەرىسىن جالعاستىرىپ، زامان تالابىنا بەيىمدەلگەن ۇلتتىڭ جاڭا بولمىسىن قالىپتاستىرۋىمىز قاجەت.

ءبىز ادىلەتتى قوعام مەن ءتيىمدى مەملەكەت قۇرۋدى كوزدەپ وتىرمىز. كەز-كەلگەن ىستە ادىلدىك قاعيداتىن باسشىلىققا الساق، بۇعان انىق قول جەتكىزەمىز. مىسالى، تۇرعىنداردىڭ تۇرمىسىن جاقسارتا تۇسپەسەك، ەلىمىزدىڭ جەتىستىكتەرى مەن حالىقارالىق تابىستارىن ماقتان ەتۋ ارتىق. ازاماتتارىمىز ەكونوميكالىق ءوسىمنىڭ يگىلىگىن سەزىنە الماسا، ودان ەش قايىر جوق. مەن ءاربىر شەشىمدى قابىلدار ساتتە وسى ۇستانىمدى باسشىلىققا الامىن. ءبىز حالىقتىڭ الەۋمەتتىك جاعدايىن جاقسارتۋمەن قاتار، بارلىق ازاماتتاردىڭ مۇددەسىن بىردەي قورعايمىز. مەنىڭ ۇعىمىمداعى ادىلەتتى مەملەكەت دەگەنىمىز – وسى، – دەدى ول.

ونىڭ ايتۋىنشا، ۇلت پەن ەل رەتىندە ساقتالىپ قالۋ ءۇشىن ۇرپاق جاڭا سىن-قاتەرلەرگە دايىن بولۋى كەرەك.

– تاريحقا كوز جۇگىرتسەك، ءار بۋىن بەلگىلى ءبىر سىناقتى باسىنان وتكەرەدى. ءبىزدىڭ بابالارىمىز "اقتابان شۇبىرىندى، القاكول سۇلامانى"، اتالارىمىز الاپات اشارشىلىقتى، قۋعىن-سۇرگىندى، دۇنيەجۇزىلىك سوعىستى كوردى.

توتاليتارلىق كەزەڭدە ۇلتتىق قۇندىلىقتارىمىزدان، تىلىمىزدەن، ءدىلىمىز بەن دىنىمىزدەن ايىرىلىپ قالا جازدادىق. ونىڭ ءبارى تاۋەلسىزدىكتىڭ ارقاسىندا حالقىمىزعا قايتا ورالدى. ءبىراق، ۇلت پەن ەل رەتىندە ساقتالىپ قالۋ ءۇشىن بۇگىنگى جانە بولاشاق ۇرپاق جاڭا سىن-قاتەرلەرگە دايىن بولۋى كەرەك، – دەدى توقايەۆ.

پرەزيدەنت جاڭا سىناقتاردا ۇلتتىق بولمىسىمىزدان، ءتول مادەنيەتىمىزدەن اجىراپ قالماۋ كەرەگىن اتاپ ايتتى.

– قازىرگى پاندەميا جانە سونىڭ سالدارىنان تۋىنداعان داعدارىس بۇكىل الەمنىڭ بۇرىن بولماعان جاڭا سىناقتارمەن بەتپە-بەت كەلىپ وتىرعانىن انىق كورسەتتى. ەكونوميكالىق، الەۋمەتتىك، ەكولوگيالىق، بيولوگيالىق جانە باسقا دا قاتەرلەرگە قوسا، جەر جۇزىنە جاعىمسىز يدەولوگيالىق ۆيرۋستار دا جايىلىپ كەلەدى. جاھاندانۋ كەزىندە ەل جات جۇرتتىڭ ىقپالىنا بەيسانالى تۇردە ىلەسىپ كەتكەنىن اڭعارمايدى. باسقاشا ايتقاندا، ماجبۇرلىكتەن ەمەس، ساناسىنىڭ ۋلانۋى ارقىلى ءوز ەركىمەن تورعا تۇسەدى. سوندىقتان، جاڭا زاماننىڭ جاقسى-جامانىن ەكشەپ، ارتىقشىلىقتارىن بويعا سىڭىرۋمەن قاتار، تامىرىمىزدى بەرىك ساقتاۋىمىز قاجەت. ۇلتتىق بولمىسىمىزدان، ءتول مادەنيەتىمىز بەن سالت-داستۇرىمىزدەن اجىراپ قالماۋ – بارلىق وركەنيەتتەر ميداي ارالاسقان الاساپىراندا جۇتىلىپ كەتپەۋدىڭ بىردەن ءبىر كەپىلى، – دەدى پرەزيدەنت.