قازاقستاندا پارلامەنت ءماجىلىسى سايلاۋى ءوتىپ جاتقاندا سايلاۋعا بويكوت جاريالاعان ازاماتتىق بەلسەندى جانبولات ماماي مەن ونىڭ جاقتاستارى الماتىدا ميتينگكە شىقتى.

تۇسكى 12-گە تامان نازاربايەۆ داڭعىلى بويىمەن كوتەرىلىپ، ساتپايەۆ كوشىسىنە ءتۇسىپ رەسپۋبليكا الاڭىنداعى تاۋەلسىزدىك مونۋمەنتىنە قاراي بەتتەمەك بولعان 20 شاقتى بەلسەندىنى جولدا ارنايى جاساق بوگەپ، ەسكەرتكىشكە قاراي جىبەرمەي، اينالدىرا قورشاپ الدى.

ولاردىڭ اراسىندا بەلسەندىلەر جانبولات ماماي مەن ابزال دوستياروۆ جانە جۋرناليست، "Oyan، Qazaqstan" قوزعالىسىنىڭ وكىلى اسەم جاپيشيەۆا بار.

قورشاۋداعى بەلسەندىلەر مەگافونمەن "سايلاۋعا بويكوت"، "ويان، قازاق! كوتەر باستى!"، "نازاربايەۆ كەتسىن"، "داريعا كەلمە"، "نەسيەلىك امنيستيا جاسالسىن"، "جەر ساتىلماسىن، جالعا بەرىلمەسىن" دەپ ۇرانداتىپ تۇردى.

ميتينگكە شىققانداردى قالالىق پروكۋراتۋرا مەن الماتى قالاسى اكىمدىگىنىڭ وكىلدەرى تاراۋعا شاقىرماق بولىپ ەدى شەرۋشىلەر ايقايلاپ، ولاردى سويلەتپەدى.

ارتىنشا عالىم، ەكونوميست راحمان الشانوۆ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاحير بالىقبايەۆ پەن بوكسشى، سيدنەي وليمپياداسىنىڭ چەمپيونى ەرماحان يبرايموۆ نارازى توپپەن ديالوگقا كەلمەك بولدى. الايدا شەرۋشىلەر ولاردىڭ دا داۋسىن ەستىرتپەدى. ميتينگشىلەر "الشانوۆ، يبرايموۆ بيلىكتىڭ سويىلىن سوققان قارابەت" دەپ ۇرانداتتى. وزىنە ايتىلعان سوزدەردەن كەيىن ميتينگشىلەرگە ۇمتىلعان بوكسشىنى الدەكىمدەر ۇستاپ قالدى. سونداي-اق الاڭدا اكىمدىك قىزمەتكەرلەرىنىڭ جانىندا قالي سارسەنباي، ەسەنعالي راۋشانوۆ، باقىت بەدەلحان سەكىلدى بىرنەشە بەلگىلى جۋرناليست، اقىن، جازۋشىلار ءجۇردى.

الاڭدا بەتتەرىن تۇمشالاعان بىرەۋلەر بەلسەندى جانبولات مامايدىڭ ءوزىن "قارابەت"، "ەل تىنىشتىعىن بۇزعان قۇمالاق"، "تاۋەلسىزدىك جاساسىن" دەپ ايقايلادى. ولار كولونكادان قاتتى داۋىسپەن اندەر قويىلىپ، ءانۇران ايتىپ بەلسەندىلەردىڭ داۋسىن ەستىرتپەۋگە تىرىسقان ارەكەتتەر جاسادى. بەلسەندىلەر بەلگىسىز ادامداردى "ارانداتۋشىلار" دەپ جاقتاستارىن قاندايدا ءبىر ارانداتۋشىلىق ارەكەتكە ەرمەۋگە شاقىردى.

پروكۋراتۋرا وكىلدەرىنىڭ تاراۋدى سۇراعانىنا قاراماستان، بەلسەندىلەر قاتارى بىرتىندەپ كوبەيىپ جاتتى. ءبىراق الاڭداعى پوليسيا مەن ارنايى جاساق سانى ودان دا كوپ. بىرنەشە اۆتوزاك پەن ارنايى اۆتوبۋستار ازىرلەنىپ قويىلعان.

قامشى ءتىلشىسى پوليسيا 10-نان استام ادامدى ۇستاپ، اۆتوزاكقا تيەگەنىن كوردى.

تۇستەن كەيىن ساعات 15:20 شاماسىندا الاڭعا بەتتەمەك بولعان "Oyan، Qazaqstan" قوزعالىنىڭ وكىلدەرىن دە ارنايى جاساق قورشاۋعا الدىپ، الاڭعا جىبەرمەدى.

ميتينگ ءوتىپ جاتقان تاۋەلسىزدىك الاڭى مەن سول جەرگە جاقىن ماڭدا ۇيالى بايلانىس ناشار، ينتەرنەت مۇلدەم ىستەمەدى.

قورشاۋداعى ميتينگشىلەر بىرنەشە ساعات اس-سۋسىز، دارەتحاناعا شىعا الماي تۇردى. نارازى توپ اراسىندا "قورشاۋدان شىعا الماعاندىقتان، وسى جەردە دارەت سىندىرۋعا تۋرا كەلدى" دەگەن سوزدەر ەستىلدى.