جاڭاوزەندە "مۇنايسپەسسناب كومپاني" ج ش س قىزمەتكەرلەرى ەڭبەكاقىسىن ارتتىرۋدى تالاپ ەتىپ، ەرەۋىلگە شىقتى، دەپ حابارلادى لادا.kz سايتى.

ماڭعىستاۋ وبلىسى مەملەكەتتىك ەڭبەك ينسپەكسياسى باسقارماسىنىڭ حابارلاۋىنشا، "مۇنايسپەسسناب كومپاني" ج ش س كولىك قىزمەتىن ۇسىنادى. كومپانيا نەگىزگى تاپسىرىس بەرۋشىسى "وزەنمۇنايگاز" اكسيونەرلىك قوعامىمەن جۇمىس ىستەۋ ءۇشىن جاڭاوزەن قالاسىنان 300-گە جۋىق جەكە كاسىپكەردى جالداعان.

– بۇگىنگى تاڭدا جالدانعان كاسىپكەرلەردىڭ 65ء-ى ساعاتىنا 1 300 تەڭگە كولەمىندەگى تاريفتىك تولەمدى 1 400 تەڭگەگە ارتتىرۋدى تالاپ ەتىپ جاتىر، – دەدى ماڭعىستاۋ وبلىسى مەملەكەتتىك ەڭبەك ينسپەكسياسى باسقارما باسشىسىنىڭ ورىنباسارى نۇرالى باۋلىبايەۆ.

نۇرالى باۋلىبايەۆتىڭ ايتۋىنشا، قازىرگى تاڭدا "مۇنايسپەسسناب كومپاني" ج ش س مەن "وزەنمۇنايگاز" اق اراسىندا كەلىسسوز ءجۇرىپ جاتىر.

– "مۇنايسپەسسناب كومپاني" ج ش س وسى جەكە كاسىپكەرلەرمەن ازاماتتىق-قۇقىقتىق سيپاتتاعى شارت جاساعاندىعىن ايتا كەتۋ كەرەك. دەمەك بۇل جانجال جۇمىس بەرۋشى مەن جۇمىسشى اراسىنداعى ەڭبەك داۋى بولىپ تابىلمايدى. سوندىقتان بۇل داۋ باسقارمانىڭ قۇزىرەتىنە كىرمەيدى. جەكە كاسىپكەرلەر بۇل ماسەلەنى تاپسىرىس بەرۋشى نەمەسە سوت ورگاندارى ارقىلى شەشۋى كەرەك، – دەدى باۋلىبايەۆ.

ەسكە  سالساق، كەشە، 1 اقپان كۇنى "مۇنايسپەسسناب كومپاني" ج ش س جۇمىسشىلارى جالاقىنى كوتەرۋدى تالاپ ەتىپ، اكسياعا شىققان بولاتىن.