پرەزيدەنت قاسىم-جومارت توقايەۆ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆتى قابىلدادى، دەپ حابارلادى اقوردا سايتى.

مينيستر مىرزاعالييەۆ ەكولوگيا، گەولوگيا جانە تابيعي رەسۋرستار مينيسترلىگىنىڭ وتكەن جىلعى جۇمىسىنىڭ نەگىزگى ناتيجەلەرى، سونداي-اق الداعى ۋاقىتتاعى جوسپارلارى تۋرالى بايانداعان.

سونداي-اق ول مەملەكەت باسشىسىنا بيىلعى وسىمدىك وسەتىن كەزەڭدى سۋمەن قامتاماسىز ەتۋ ماسەلەلەرى جايىندا ايتقان.

ءمينيستردىڭ مالىمەتىنشە، بيىل قاردىڭ از تۇسۋىنە بايلانىستى ەلدە سۋ تاپشىلىعى بولۋى مۇمكىن. بۇل رەتتە پرەزيدەنت سۋ ارنالارىن سيفرلاندىرۋ جونىندەگى جۇمىستىڭ ماڭىزدىلىعىن اتاپ ءوتتى. الداعى 5 جىل ىشىندە بۇكىل رەسپۋبليكا بويىنشا 119 ارنانى سيفرلاندىرۋ قاجەت.

مينيستر توقايەۆقا بالىق شارۋاشىلىعىن دامىتۋدىڭ 2030 جىلعا دەيىنگى باعدارلاماسى جۇزەگە اسىرىلا باستاعانىن ايتتى. ماعزۇم مىرزاعالييەۆتىڭ پىكىرىنشە، 10 جىل ىشىندە بالىق ءوندىرىسىن 9 مىڭنان 270 مىڭ تونناعا دەيىن ارتتىرۋعا مۇمكىندىك بار.

سونىمەن قاتار مينيستر مىرزاعالييەۆ پرەزيدەنتكە گەولوگيالىق بارلاۋ، ەكولوگيالىق تۋريزم جانە ۇلتتىق پاركتەردىڭ جاي-كۇيى تۋرالى باياندادى.

كەزدەسۋ سوڭىندا مەملەكەت باسشىسى ەكولوگيا، گەولوگيا جانە تابيعي رەسۋرستار مينيسترىنە ءبىرقاتار ناقتى تاپسىرما بەردى.