جازۋشى، دراماتۋرگ، قازاقستاننىڭ ەڭبەك سىڭىرگەن قايراتكەرى انەس ساراي قايتىس بولدى. بۇل تۋرالى اقپارات جانە قوعامدىق دامۋ ءمينيسترى ايدا بالايەۆا facebook پاراقشاسىندا حابارلادى.

– بۇگىن حالقىمىزعا تانىمال دارىندى جازۋشى، زيالى ازامات، بەلگىلى قوعام قايراتكەرى انەس ساراي اعامىز ومىردەن وزدى..

وكىنىشكە قاراي، ۋاقىت العا جىلجىعان سايىن الدىڭعى بۋىن اعا-اپالارىمىز ماڭگىلىك ساپارعا اتتانىپ جاتىر. ءومىر بار جەردە – ءولىم بار دەسەك تە، بۇل – ءبىر اۋلەتتىڭ عانا ەمەس، ادەبيەت سۇيەر قاۋىمى بار بۇكىل قوعام ءۇشىن ورنى تولماس اۋىر قايعى بولىپ وتىر.

رۋحانيات سالاسىنا قاتىستى تالاي ىستە اعامىزدىڭ الدىن كورىپ، اعالىق اقىلىن تىڭداپ، جاقىن سىيلاستىقتا ارالاسقان ەدىك.

اعامىزدىڭ جارقىن بەينەسى مەن ادەبيەت الەمىندەگى شىعارمالارى قالىڭ وقىرمان قاۋىمنىڭ رۋحاني ولجاسىنا اينالىپ، حالىق جادىندا ماڭگى ساقتالادى.

اعامىزدىڭ قازاسىنا بايلانىستى – التىنشاش جاعانوۆا اپامىزعا جانە بارلىق اعايىن-تۋىس، جاقىندارىنىڭ قايعىلارىنا ورتاقتاسىپ، كوڭىل ايتامىن، – دەپ جازدى مينيستر پاراقشاسىندا.

ساراي انەس تولەندى ۇلى – جازۋشى، دراماتۋرگ، قازاقستاننىڭ ەڭبەك سىڭىرگەن قايراتكەرى. 1937 جىلى رەسەيدە، استراحان وبلىسى، ۆولودارسكيي اۋدانى، كىرمالاي اۋىلىندا تۋعان. قازۇۋ-دى بىتىرگەن. "ەگەمەن قازاقستان"، "جاس الاش" گازەتتەرىندە ادەبي قىزمەتكەر، ءبولىم مەڭگەرۋشىسى، "جازۋشى" باسپاسىندا رەداكتور، قازاقستان جازۋشىلار وداعىندا ادەبي كەڭەسشى بولىپ قىزمەت اتقارعان. ول باتىس الاشوردا تاريحىن قامتيتىن "ەدىل-جايىق" رومانىنىڭ جانە الاش كوزعالىسىنا قاتىستى دەرەكتى ماتەريالداردىڭ اۆتورى بولعان.

"مۇنارالار شاقىرادى" (1969)، "بوزقىراۋ" (1973)، "قاراشا وتكەن سوڭ" (1974) اتتى اڭگىمە-پوۆەستەرىندە، "توسقاۋىل" (1976)، "التىن ارال" (1984)، "ەدىل—جايىق" (1994) روماندارىندا استراحان-اتىراۋ ءوڭىرى ەڭبەككەرلەرىنىڭ ءومىرىن، تىنىس-تىرشىلىگىن ارقاۋ ەتكەن. "مۇحاممەد پايعامباردىڭ ءومىرى"، "يساتاي مەن ماحامبەت"، "قۋ تازشا"، "تويتيىپ قالدى"، "ارۋ الماتى"،  "مۇڭىم مەنىڭ"، "اڭساۋ" پەسالارىنىڭ اۆتورى. ق ر مەملەكەتتىك سىيلىعىنىڭ لاۋرەاتى (1996).