جامبىل وبلىسى سارىسۋ اۋدانىنىڭ اكىمى قىزمەتىنەن بوساتىلدى. بۇل تۋرالى وبلىس اكىمدىگىنىڭ رەسمي سايتى مالىمدەدى.
"قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا جامبىل وبلىسى اكىمىنىڭ وكىمىنە سايكەس، جاقسىلىقوۆ باقىتجان الپىس ۇلى سارىسۋ اۋدانى اكىمىنىڭ قىزمەتىنەن بوساتىلدى" دەلىنگەن رەسمي سايت تاراتقان حابارلامادا.
باقىتجان الپىس ۇلى 2020 جىلى سارىسۋ اۋدانىنىڭ اكىمى بولىپ تاعايىندالعان بولاتىن.
ەسكە سالا كەتەيىك، 19 اقپاندا سارىسۋ اۋدانىنىڭ ورتالىعى جاڭاتاس قالاسىندا 5 قاباتتى تۇرعىن ءۇيدىڭ 3ء-شى قاباتىندا ءورت بولعان. پاتەر ىشىندە اتا-انانىڭ قاراۋىنسىز كامەلەت جاسىنا تولماعان 2015، 2016، 2017، 2019 جانە 2020 جىلدارى تۋعان 5 بالا قالعان.
ءورت بولعان ۋاقىتتا ءۇيدىڭ وتاعاسى جۇمىستا بولعانى، ال اناسى دۇكەنگە شىعىپ كەتكەنى حابارلاندى. تۇتىنگە ۋلانعان بالالار جەدەل تۇردە اۋرۋحاناعا جەتكىزىلگەنىمەن، اراعا ءبىراز ۋاقىت سالىپ كوز جۇمعان.
پىكىر قالدىرۋ