اككرەديتتەۋ جانە رەيتينگتىڭ تاۋەلسىز اگەنتتىگى (ناار/IAAR) جانە اككرەديتتەۋدىڭ تاۋەلسىز قازاقستاندىق ورتالىعى ورتالىق ازيا ۋنيۆەرسيتەتى، اقتاۋ گۋمانيتارلىق-تەحنيكالىق ۋنيۆەرسيتەتى (بۇرىنعى قازاقستان تەڭىز ۋنيۆەرسيتەتى) جانە «استانا» ۋنيۆەرسيتەتىنىڭ اككرەديتتەۋ تۋرالى كۋالىكتەرىن كەرى قايتارىپ الدى، دەپ حابارلادى ءبىلىم جانە عىلىم مينيسترلىگىنىڭ باسپا ءسوز قىزمەتى.
"ءبىلىم تۋرالى" زاڭعا سايكەس ليسەنزياسىز جانە اككرەديتاسياسىز جوعارى وقۋ ورىندارى ديپلوم بەرە المايدى.
– ەستەرىڭىزدە بولسا، ءدال وسى ءۇش جوعارى وقۋ ورنى بىزگە دە تەكسەرۋ جۇمىستارىن جۇرگىزۋگە كەدەرگى جاسادى. وسىعان دەيىن جۇرگىزىلگەن تەكسەرۋلەر ناتيجەسىندە بۇل وقۋ ورىندارىنادا ءبىرقاتار بۇزۋشىلىقتار انىقتالعان بولاتىن. اككرەديتاسيالارى بويىنشا دا پروبلەمالارى بولدى. وتكەن جىلى تۇلەكتەرى ديپلومدارىن ۋاقىتىلى الا الماي قينالعان ەدى. سالدارىنان ماگيستراتۋراعا وقۋعا ءتۇسۋ نەمەسە جۇمىسقا تۇرۋعا بايلانىستى قيىندىقتارعا تاپ بولدى. وكىنىشكە قاراي، بۇل جوعارى وقۋ ورىندارىندا وقۋىن جالعاستىرىپ جاتقان ستۋدەنتتەر بۇل جاعدايدان ساباق المادى. بيىل دا كادرلاردى دايىنداۋ ساپاسىنا قاتىستى سول ماسەلەلەر كوتەرىلىپ جاتىر. ەندى بۇل وقۋ ورىندارى بۇعان دەيىن جۇرگىزگەن تەكسەرۋلەرىمىزدىڭ ناتيجەلەرى بويىنشا ءتيىستى شەشىم قابىلداۋىمىزعا كەدەرگى كەلتىرىپ، ءتۇرلى امالدارىمەن ۋاقىتتى سوزىپ جاتىر، – دەدى ق ر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
اككرەديتتەۋ تۋرالى كۋالىكتەرى كەرى قايتارىلعان وقۋ ورىندارىنىڭ ءبىرى – ورتالىق ازيا ۋنيۆەرسيتەتى ەكس-دەپۋتات، 2019 جىلعى پرەزيدەنت سايلاۋىنا كانتيدات اتانباق بولىپ، مەملەكەتتىك ءتىل سىناعىنان وتە الماعان جۇماتاي الييەۆكە تيەسىلى.
پىكىر قالدىرۋ