«Nur Otan» پارتياسىندا ءماجىلىستىڭ جانە بارلىق دەڭگەيدەگى ءماسليحاتتاردىڭ 600 جاس دەپۋتاتىنان تۇراتىن كورپۋس قۇرىلدى. نۇروتاندىق جاس دەپۋتاتتار جاستاردى قولداۋ جانە زاڭ شىعارۋ پروسەسىندە ولاردىڭ مۇددەلەرىن قورعاۋ ءۇشىن كۇش-جىگەرلەرىن بىرىكتىرۋگە نيەتتى.

باسپا ءسوز قىزمەتى تاراتقان اقپاراتقا سايكەس، ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا بەلگىلەنگەن كۆوتانىڭ ارقاسىندا بارلىق دەڭگەيدەگى ءماسليحاتتاردا «Nur Otan» پارتياسىنىڭ جاس دەپۋتاتتارىنىڭ سانى 3 ەسەگە – 7-دەن 23%-عا دەيىن ارتقان. 2025 جىلعا دەيىنگى «جاستار – وتانعا!» باعدارلاماسى قابىلدانىپ، وندا الەۋمەتتىك ليفت قۇرۋ، جاستاردىڭ باستامالارىن ىسكە اسىرۋ، جۇمىسقا ورنالاستىرۋ، ءبىلىم بەرۋ ساپاسىن ارتتىرۋ سياقتى جانە ت. ب. 100-دەن استام ناقتى شارالار قامتىلماق.

– كورپۋس جۇمىسى اياسىندا تۇرعىندارمەن تىعىز قارىم-قاتىناس ورناتىپ، ءارتۇرلى ساناتتاعى جاستارمەن بايلانىس ورناتۋ ماڭىزدى. ونىڭ ىشىندە الەۋمەتتىك جەلى ارقىلى جۇمىس ىستەۋگە، بارىنشا اشىق ءارى حالىققا جاقىن بولۋعا دەن قويۋ قاجەت. سىزدەردىڭ ءارقايسىڭىز – پارتيانىڭ سەنىم مانداتىنا يە بولعان جاس ساياساتكەرسىزدەر. پارتيانىڭ حالىققا جاقىن بولۋ، تۇرعىندارمەن «كەرى بايلانىس» ورناتۋ، قوعامداعى ءار ءتۇرلى توپتاردىڭ ۇنىنە قۇلاق اسىپ، ەلمەن تىعىز، قويان-قولتىق جۇمىس ىستەۋ قاعيدالارىن باسشىلىققا الۋ كەرەك. اتالعان تاپسىرمالاردى ساپالى جانە ناتيجەلى ىسكە اسىرۋ ءۇشىن جاس دەپۋتاتتار كورپۋسىنا پارتيا تاراپىنان بارىنشا قولداۋ كورسەتىلەتىن بولادى، – دەدى جاستارمەن وتكەن ونلاين كەزدەسۋ بارىسىندا پارتيا حاتشىسى الىبەك الدەنەي.

پارتيانىڭ باسپا ءسوز قىزمەتىندە اتاپ وتكەندەي، ءماجىلىس پەن بارلىق دەڭگەيدەگى ءماسليحاتتاردىڭ 616 جاس دەپۋتاتىنىڭ 427ء-سى نەمەسە 69%-ى پارتيا ليدەرى نۇرسۇلتان نازاربايەۆتىڭ باستاماسىمەن جۇزەگە اسقان پارتياىشىلىك پرايمەريزدەن وتكەندەر.

داۋىس بەرۋ قورىتىندىسى بويىنشا جاس دەپۋتاتتار كورپۋسىنىڭ باسشىسى بولىپ پارلامەنت ماجىلىسىندەگى «Nur Otan» پارتياسى فراكسياسىنىڭ دەپۋتاتى ەلنۇر بەيسەنبايەۆ سايلاندى.