پرەزيدەنت ق.توقايەۆ "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى، دەپ حابارلادى پرەزيدەنتتىڭ باسپا ءسوز حاتشىسى بەرىك ءۋالي.
"اتالعان زاڭ بويىنشا اۋىل شارۋاشىلىعى جەرلەرىن شەتەلدىكتەرگە، ازاماتتىعى جوق ادامدارعا، شەتەلدىك زاڭدى تۇلعالارعا، شەتەلدىك قاتىسۋى بار قازاقستان رەسپۋبليكاسىنىڭ زاڭدى تۇلعالارىنا، حالىقارالىق ۇيىمدارعا، حالىقارالىق قاتىسۋى بار عىلىمي ورتالىقتارعا، سونداي-اق، قانداستارعا جەكە مەنشىككە جانە جالعا بەرۋگە تىيىم سالىنادى. وسىلايشا اۋىل شارۋاشىلىعى جەرلەرىن پايدالانۋ قۇقىعى تەك قانا قازاقستان ازاماتتارىنا جانە شەتەلدىك قاتىسۋى جوق زاڭدى تۇلعالارعا بەرىلەدى" دەپ جازدى بەرىك ءۋالي facebook پاراقشاسىندا.
بۇعان دەيىن پرەزيدەنت باستاماشىل بولىپ، پرەزيدەنت اكىمشىلىگى ازىرلەگەن زاڭ جوباسى ماجىلىسكە تۇسكەننەن كەيىن وعان شەتەلدىكتەرگە ورمان ءوسىرۋ ءۇشىن جەر بەرۋدى كوزدەيتىن تارماقتار ەنگىزىلىپ، سەناتقا جولدانعان. بۇل وزگەرىستەر قوعامدا نارازىلىققا ۇشىراپ، بەلسەندىلەر ميتينگكە شىققان. ارتىنشا، سەنات داۋ تۋدىرعان باپتارعا تىيىم سالىپ، ماجىلىسكە قايتارعان. ءماجىلىس سەنات ەنگىزگەن تۇزەتۋلەردى ماقۇلداعان.
پىكىر قالدىرۋ