مادەنيەت جانە سپورت ءمينيسترى اقتوتى رايىمقۇلوۆا ءانشى ديماش قۇدايبەرگەندى قابىلداپ، تۋعان كۇنىنە وراي پرەزيدەنت قاسىم-جومارت توقايەۆتىڭ قۇتتىقتاۋ حاتىن تابىستادى. بۇل تۋرالى ۆەدومستۆونىڭ باسپا ءسوز قىزمەتى حابارلادى.

"قۇرمەتتى ديماش! جاس كەزىڭنەن ونەر جولىن تاڭداپ، ۇزدىكسىز ەڭبەكتىڭ ناتيجەسىندە ۇلكەن بەلەستەردى باعىندىرا ءبىلدىڭ. الدىمەن رەسپۋبليكالىق، كەيىن حالىقارالىق بايقاۋلاردا دارا شىقتىڭ. ءان ارقىلى ۇلتتىق قۇندىلىقتارىمىزدى دارىپتەپ، قازاقتىڭ ءتىلىن، قوڭىر دومبىراسىن، ىزگى داستۇرلەرىن الەمگە تانىتىپ كەلەسىڭ.

الداعى ۋاقىتتا ەلىمىزدىڭ رۋحاني-مادەني سالاسىن وركەندەتۋگە مول ۇلەس قوسىپ، ءبىلىمىڭ مەن كاسىبي بىلىكتىلىگىڭدى جەتىلدىرە بەرەتىنىڭە سەنىم ارتامىن. وزىڭە دەنساۋلىق، جاڭا تابىستار تىلەيمىن!" دەلىنگەن پرەزيدەنتتىڭ قۇتتىقتاۋ حاتىندا.

مۇنان سوڭ اقتوتى رايىمقۇلوۆا تۋعان كۇن يەسىن ءوز اتىنان قۇتتىقتاپ، شىعارماشىلىق تابىس تىلەدى.

"الداعى ۋاقىتتا دا جۇرەك قىلىن شەرتەتىن تۋىندىلارىڭىزدىڭ قاتارى كوبەيىپ، ونەرسۇيەر قاۋىمدى قۋانتا بەرۋىڭىزگە تىلەكتەسپىن. وسىناۋ ەرەكشە ءساتتى پايدالانا وتىرىپ، سىزگە ۇزاق عۇمىر، زور دەنساۋلىق، قاجىماس قايرات، شىعارماشىلىق شابىت، وتباسىڭىزعا اماندىق پەن ورتايماس نەسىبە-داۋلەت تىلەيمىن!" دەپ جازىلعان ءمينيستردىڭ قۇتتىقتاۋ حاتىندا.