پرەزيدەنت قاسىم-جومارت توقايەۆ جامبىل وبلىسىنىڭ اكىمى بەردىبەك ساپاربايەۆتى قابىلدادى. بۇل تۋرالى اقوردا سايتى حابارلادى.

سايت مالىمەتىنشە، وبلىس اكىمى مەملەكەت باسشىسىنا ءوڭىردىڭ بيىلعى ءتورت ايداعى دامۋ قورىتىندىلارى مەن پرەزيدەنت تاپسىرمالارىنىڭ ورىندالۋ بارىسى، سونداي-اق جامبىل وبلىسىندا جۇزەگە اسىرىلىپ جاتقان جوبالار مەن قورداي اۋدانىنداعى احۋال جونىندە بايانداعان.

بەردىبەك ساپاربايەۆ ءقاڭتار-ساۋىر ايلارىندا جامبىل وبلىسىنىڭ ونەركاسىپ كورسەتكىشى 107،1 پايىزعا، اۋىل شارۋاشىلىعى 103،2 پايىزعا، قۇرىلىس 110،3 پايىزعا ارتىپ، وڭىرگە قۇيىلعان ينۆەستيسيا 75،2 ميلليارد تەڭگەگە جەتكەنىن ايتتى. سونىمەن قاتار بىلتىر وبلىستا 768 مىڭ گەكتار جەرگە ەگىن ەگىلسە، بيىل ەگىستىك القاپ 46 مىڭ گەكتارعا ۇلعايعان.

وبلىستاعى ەپيدەميولوگيالىق جاعداي دا ءسوز بولدى. جالپى 2580 توسەك-ورىن ازىرلەنگەن. مەديسينالىق قۇرال-جابدىقتارمەن قامتۋ ءتيىستى دارەجەدە جۇرگىزىلىپ، دارىلىك زاتتاردىڭ جەتكىلىكتى قورى قالىپتاسقان. جوسپار بويىنشا 582 مىڭ ازاماتقا ۆاكسينا سالۋ كەرەك بولسا، بۇگىندە 100 مىڭ ادامعا ەكپە ەگىلگەن.

"ايماقتا پرەزيدەنت تاپسىرماسىنا سايكەس وزگە ۇلت وكىلدەرى تىعىز شوعىرلانعان 25 ەلدى مەكەننىڭ ەتنو كارتاسى جاساقتالعان. مەملەكەت باسشىسىنا قورداي اۋدانىنداعى احۋال جونىندە باياندالدى. وبلىس اكىمىنىڭ ايتۋىنشا، اۋدانداعى جاعداي تۇراقتى. بىلتىر تۇرعىن ءۇي، جول قۇرىلىسى، ءبىلىم بەرۋ، مەديسينا، مادەنيەت جانە سپورت  سالالارى بويىنشا جالپى قۇنى 35،1 ميلليارد تەڭگە بولاتىن 392 جوبا ىسكە اسىرىلعان. بارلىق زارداپ شەككەن نىساندار مەن تۇرعىن ۇيلەر تولىعىمەن قالپىنا كەلتىرىلگەن.

گۆاردەيسك اۋىلىنداعى بيولوگيالىق قاۋىپسىزدىك پروبلەمالارى جونىندەگى عىلىمي-زەرتتەۋ ينستيتۋتىنىڭ بازاسىندا وتاندىق يممۋندىق پرەپاراتتار شىعاراتىن زاۋىتتىڭ قۇرىلىس-مونتاج جۇمىستارى اياقتالىپ، ءتيىستى قوندىرعىلاردى ورناتۋ جۇمىستارى جۇرگىزىلۋدە. زاۋىتتىڭ سىنامالىق قوسىلۋى ماۋسىم ايىنا بەلگىلەنگەن" دەلىنگەن حابارلامادا.

مەملەكەت باسشىسى وبلىستاعى ەپيدەميالىق احۋالدى باقىلاۋدا ۇستاۋ، ينۆەستيسيا تارتۋ جانە مەملەكەتتىك باعدارلامالاردى ءتيىمدى جۇزەگە اسىرۋ جۇمىستارىن جانداندىرۋ جونىندە تاپسىرما بەردى.