ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىنىڭ رەكتورلارىمەن كەڭەس وتكىزدى. كەزدەسۋ بارىسىندا ءبىرى ستۋدەنتتەر مەن وقىتۋشىلاردىڭ قاۋىپسىزدىك ماسەلەلەرى قارالدى، دەپ حابارلادى مينيسترلىكتىڭ باسپا ءسوز قىزمەتى.
مينيستر ءبىلىم وردالارىنداعى قۇرال-جابدىقتارعا تۇگەندەۋ جۇرگىزۋ، بەينەكامەرالاردىڭ جەدەل باسقارۋ ورتالىقتارىنا قوسىلۋىن قامتاماسىز ەتۋ، جوعارى وقۋ ورىندارىنا كىرگىزۋ رەجيمىن كۇشەيتۋدى جانە ستۋدەنتتەر اراسىندا وقۋ-جاتتىعۋ ساباقتارىن وتكىزۋدى تاپسىردى. سونداي-اق جاتاقحانالاردا پىسىقتالۋى ءتيىس قاۋىپسىزدىكتى كۇشەيتۋ شارالارى دا ايتىلدى.
– قازانداعى قايعىلى جاعداي مەكتەپتەر مەن كوللەدجدەردەگى قاۋىپسىزدىكتى كۇشەيتۋ قاجەتتىگىن كورسەتتى. وسىنداي قورقىنىشتى جاعدايلاردىڭ قايتالانۋىنا جول بەرمەۋ ءۇشىن مەكتەپتەرمەن قوسا، ۋنيۆەرسيتەتتەردە دە قاۋىپسىزدىك شارالارىن كۇشەيتۋىمىز كەرەك. ستۋدەنتتەر مەن وقىتۋشىلار توتەنشە جاعدايلاردا ءوزىن قالاي ۇستاۋ كەرەكتىگىن ءبىلۋى ءتيىس. ءبىز قولدا بار جابدىقتاردى تەكسەرىپ، قاجەت بولعان جاعدايدا قوسىمشا جابدىق ورناتۋىمىز كەرەك. قاۋىپسىزدىك شارالارى قولدانىلىپ، وقۋ جاتتىعۋلارى نەعۇرلىم ءجيى وتكىزىلەتىن بولسا، ءبىزدىڭ بالالارىمىزدىڭ دا قاۋىپسىزدىگى سوعۇرلىم ارتا تۇسەدى، – دەپ اتاپ ءوتتى مينيستر اسحات ايماعامبەتوۆ
جۋىردا تاتارستان استاناسى قازان قالاسىنداعى مەكتەپكە 19 جاستاعى ءجاسوسپىرىم قارۋمەن شابۋىل جاساپ، سونىڭ سالدارىنان ەكى ءمۇعالىم، جەتى وقۋشى قازا تاۋىپ، 21 ادام جاراقات العان. وسى وقيعادان كەيىن ءبىلىم وردالارىنداعى قاۋىپسىزدىك ماسەلەسىنە باسا ءمان بەرىلە باستادى.
پىكىر قالدىرۋ