پرەزيدەنت قاسىم-جومارت توقايەۆ دۇنيەجۇزىلىك دەنساۋلىق ساقتاۋ اسسامبلەياسىنىڭ 74ء-شى سەسسياسىنىڭ جابىلۋىندا ۆيدەو ۇندەۋ جاسادى. بۇل تۋرالى اقوردا سايتى حابارلادى.

24 مامىر مەن 1 ماۋسىم ارالىعىندا ءوتىپ جاتقان شاراعا دۇنيەجۇزىلىك دەنساۋلىق ساقتاۋ ۇيىمىنا مۇشە 194 مەملەكەتتىڭ دەلەگاتتارى قاتىسىپ جاتىر. سەسسيانىڭ نەگىزگى تاقىرىبى – "قازىرگى پاندەميانىڭ اياقتالۋى جانە الداعى ىندەتتەردىڭ الدىن الۋ: ءتيىمدى، ءقاۋىپسىز ءارى بەيبىت الەمدى بىرلەسىپ قۇرۋ".

قاسىم-جومارت توقايەۆ دۇنيەجۇزىلىك دەنساۋلىق ساقتاۋ اسسامبلەياسىنىڭ سەسسياسى بۇكىل الەم 1،5 جىلدان بەرى كوروناۆيرۋسپەن كۇرەسىپ جاتقان اسا كۇردەلى كەزەڭدە ءوتىپ وتىرعانىنا توقتالدى. پرەزيدەنتتىڭ ايتۋىنشا، كوروناۆيرۋس ۇلتتىق دەنساۋلىق ساقتاۋ جۇيەلەرى مەن كوپجاقتى ينستيتۋتتار ءۇشىن تەڭدەسسىز سىناق بولعان.

– عالامدىق داعدارىس كەزىندە دۇنيەجۇزىلىك دەنساۋلىق ساقتاۋ ۇيىمى بارلىق مۇشە مەملەكەتتەرمەن بەلسەندى قارىم-قاتىناس جاسادى. ۇيىم ءوزىنىڭ بىلىكتىلىگىمەن، باستاماشىلدىعىمەن، مول تاجىريبەسىمەن دامۋشى جانە دامىعان ەلدەردىڭ ىندەتكە قارسى كۇرەسىنە باسشىلىق ەتتى. ول عالىمداردىڭ عىلىمي جاڭالىقتار اشۋىنا ۇيىتقى بولدى. سونىمەن قاتار مۇقتاج جاندار ءۇشىن قاجەتتى رەسۋرستاردى جۇمىلدىرۋدى شۇعىل ۇيىمداستىردى، – دەدى پرەزيدەنت.

قاسىم-جومارت توقايەۆتىڭ ايتۋىنشا، اسسامبلەيانىڭ قازىرگى قىزمەتى جاسامپازدىق پەن ۇجىمدىق جاۋاپكەرشىلىككە نەگىزدەلگەن بولاشاق باعىت-باعداردى ايقىنداۋعا جاقسى مۇمكىندىك بەرەدى.

پرەزيدەنت كەشەگى مەن بۇگىنگىنىڭ اۋىر سىناقتارىنان ساباق الىپ، ددسۇ باس ديرەكتورى تەدروس ادحانوم گەبرەيەسۋستىڭ ۇسىنىسىن تولىق قولدايتىنىن ايتتى. بۇل ۇسىنىستار ددسۇ-نى رەفورمالاۋعا جانە ونى قۋاتتى، ءتيىمدى ءارى قارجىلىق تۇرعىدان دەربەس حالىقارالىق دەڭگەيدەگى ۇيىم رەتىندە ترانسفورماسيالاۋعا باعىتتالعان.

توقايەۆ ۇندەۋىندە العاشقى مەديسينالىق-سانيتارلىق كومەكتىڭ ماڭىزىنا، اتاپ ايتقاندا، 2018 جىلعى استانا دەكلاراسياسىن ىلگەرىلەتۋگە نازار اۋداردى.