"Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك الماتىدا ازاماتتاردى قابىلدادى. ول 2016 جىلى وڭتۇستىك استانادا ورىن العان تەراكت كەزىندە قازا تاپقان پوليسەي ايان عالييەۆتىڭ وتباسىمەن جانە 10 بالا تاربيەلەپ وتىرعان كوپبالالى جالعىزباستى انامەن كەزدەستى دەپ حابارلايدى Qamshy.kz اقپارات اگەنتتىگى "AstanaTV" تەلەارناسىنا سىلتەمە جاساپ.

5 جىل بۇرىن الماتىلىق پوليسەي ايان عالييەۆتىڭ وتباسى اسىراۋشىسىنان ايىرىلدى. پوليسيا قىزمەتكەرى تەرروريست قولىنان قازا تاپتى. مارقۇمنىڭ زايىبى مەن ەكى بالاسىنا تۇڭعىش پرەزيدەنت نۇرسۇلتان نازاربايەۆتىڭ اتىنان سول كەزدەگى قالا اكىمى باۋىرجان بايبەك پاتەر كىلتىن تابىس ەتكەن بولاتىن.

جاڭا قونىس يەلەرىنىڭ تۇرعىن ۇيگە الاڭسىز جايعاسۋى ءۇشىن جوندەۋ جۇمىستارىنا دا كومەك بەرىلدى. "سودان بەرى مەملەكەتتىڭ عانا ەمەس، بارشا قازاقستاندىقتاردىڭ قولداۋىن سەزىنىپ كەلەمىز" دەيدى پوليسيا قىزمەتكەرىنىڭ جەسىرى انار اسانوۆا پارتيا ءتوراعاسىنىڭ ءبىرىنشى ورىنباسارىمەن كەزدەسۋ بارىسىندا.

– بۇل تراگەديا بولعان كەزدە مەن بالالارىمىز، ولاردىڭ بولاشاعى ءۇشىن قاتتى الاڭدادىم. ويتكەنى، ءبىز اسىراۋشىمىزدان ايرىلىپ قالدىق. ءبىراق، كەيىن ءبىز جالعىز ەمەس ەكەنىمىزدى ۇعىندىق. بىزگە مەملەكەت، ەلباسى اۋقىمدى كومەك پەن قولداۋ كورسەتتى. بىزگە سىيعا بەرىلگەن پاتەر مەن ەرەكشە نازار اۋدارعاندارى ءۇشىن العىسىم شەكسىز. جۇبايىمنىڭ ءوزى ومىردەن وتسە دە، ول بىزگە مەملەكەتتىڭ اتىنان ءالى دە كومەك بەرىپ جاتىر، – دەدى انار اسانوۆا.

باۋىرجان بايبەك كوپبالالى انا اينۇر ارعىنبەكوۆامەن دە كەزدەستى. كۇيەۋى قايتىس بولعان سوڭ 10 بالاسىمەن قالعان كەلىنشەك نەبىر قيىن كۇندەردى باستان وتكەرگەنىن ايتتى. قاراجات تاپشىلىعىنان ولمەستىڭ كۇنىن كەشىپ، ۇي-كۇيسىز جۇرگەندە مەملەكەت كومەك قولىن سوزعان. مەسەناتتاردىڭ قولداۋىمەن جالعىزباسى انا الماتىدان ءۇش بولمەلى پاتەر الدى. 

– 4 جىل بۇرىن ەلباسى اتىنان باۋىرجان قىدىرعالي ۇلىنىڭ قولىنان پاتەر كىلتىن الدىق. بۇگىن ول ءبىزدى تاعى دا كەزدەسۋگە شاقىرىپ، حال-جاعدايىمىزدى سۇراپ جاتىر. وسىنداي قامقورلىعى ءۇشىن راقمەت ايتامىن. ەگەر مەملەكەت بولماسا، نە ىستەرىمدى ءتىپتى، بىلمەس ەدىم، – دەدى اينۋر ارگىنبەكوۆا. 

"ءوز كەزەگىندە "Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ازاماتتاردى قابىلداۋ بارىسىندا بۇگىندە ەلباسى، پارتيا ليدەرى نۇرسۇلتان نازاربايەۆ پەن مەملەكەت باسشىسى قاسىم-جومارت توقايەۆتىڭ تاپسىرماسى بويىنشا الەۋمەتتىك وسال توپتارعا، كوپبالالى وتباسىلارعا دا ەرەكشە كوڭىل بولىنەتىنىن اتاپ ءوتتى. "باقىتتى وتباسى" باعدارلاماسى قارقىندى ىسكە اسىرىلۋدا.

بۇل ماسەلەدەن "Nur Otan" پارتياسىنىڭ مۇشەلەرى دە شەتتە قالمايدى. جىل باسىنان بەرى پارتيانىڭ قوعامدىق قابىلداۋلارى 14 مىڭنان استام قابىلداۋ وتكىزىپ، 74 مىڭ قازاقستاندىقتىڭ مۇڭ-مۇقتاجىن تىڭدادى. وتىنىشتەردىڭ 96%-ى وڭ شەشىمىن تاۋىپ، كونسۋلتاتيۆتىك، قۇقىقتىق جانە وزگە دە كومەك كورسەتىلدى. قالعان 4% ورىندالۋ ۇستىندە. جالپى، سوڭعى 2 جىلدا پارتيا مۇشەلەرى جارتى ميلليوننان استام ءوتىنىش قابىلدادى. ولاردىڭ 74% ينتەرنەت ارقىلى جولدانعان" دەلىنگەن سيۋجەتتە.