شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنا قاراستى №2 ارناۋلى الەۋمەتتىك قىزمەتتەر كورسەتۋ ورتالىعىندا جاسى ون سەگىز جاستان اسقان ءى-ىى توپتاعى پسيحونيەۆرولوگيالىق اۋرۋلارى بار، كومەككە مۇقتاج مۇگەدەكتەرگە قىزمەت كورسەتىلەدى. قازىرگى تاڭدا ورتالىقتا 246 ازامات 8 باعىت بويىنشا ارناۋلى الەۋمەتتىك قىزمەت تۇرلەرىن الۋدا.

بۇگىندە ورتالىقتىڭ الەۋمەتتىك-مەديسينالىق قىزمەتى بويىنشا دارىگەرلەردىڭ بولمەسى، ستوماتولوگيا، اكۋشەر-گينەكولوگ، ماسساج، ساۋلەمەن ەمدەۋ، ەمدىك دەنە شىنىقتىرۋ بولمەلەرى بار. سونىمەن قاتار، قىزمەت الۋشىلارعا پسيحولوگيالىق كومەك كورسەتۋ بويىنشا دا قارقىندى جۇمىستار جۇرگىزىلەدى. ەمدەلۋشىلەردىڭ ەڭبەك تەراپياسىنا ارنالعان ارنايى بولمەلەر، ىڭعايلى پاندۋستار، قىزمەت الۋشىلارعا بارلىق جاعدايلار جاسالعان.

جاقىندا ورتالىقتىڭ تەحنيكالىق بازالارىن جاڭارتۋ ماقساتىندا جاڭا وندىرىستىك زاتتار، مەديسينالىق قۇرالدار مەن جيھازدار الىندى. ورتالىققا الىنعان باكتەريسيدتى كامەرا، وندىرىستىك ۇتىك، كىر جۋۋ قوندىرعىسى جانە ت.ب. قاجەتتى قۇرالدار قىزمەت الۋشىلارعا ەمدىك شارالارىن جۇرگىزۋدە سەپتىگىن تيگىزۋدە.

اتاپ ايتساق، ۋلتراكۇلگىن باكتەريسيدتى كامەرالار مەديسينالىق قىزمەتتىڭ كەز-كەلگەن بەيىنىنە ارنالعان. ولار ستەريلدى مەديسينالىق قۇرالدارمەن جۇمىس جۇرگىزىلەتىن وپەراسيالىق، تاڭۋ، قاراۋ ورتالىقتىڭ ستوماتولوگيالىق كابينەتتەرىندە، ەمدەۋ-پروفيلاكتيكالىق بولمەلەرىندە قولدانىلۋدا.

ايتا كەتەرلىگى، ورتالىق تاريحي - حرونولوگيالىق تارتىپتە 1953 جىلى 30 قاراشا ايىنان «شىمكەنت قورعاسىن زاۋىتى كەزىندەگى مۇگەدەكتەر ءۇيى» دەپ اتالىپ، بۇگىنگى تاڭعا دەيىن بىرنەشە اتاۋى اۋىستىرىلعان.