نۇر-سۇلتاندا كەشكى ۋاقىتتا جۇگىرۋگە شىققان ايەلدى زورلاماق بولعان ەر ادام ۇستالدى. بۇل تۋرالى قالالىق پوليسيا دەپارتامەنتىنىڭ باسپا ءسوز قىزمەتى حابارلادى.

وقيعا 3 قىركۇيەك ساعات 19:34-تەر شاماسىندا بولعان. 102-ارناسىنا جاس جىگىتتىڭ ايەلدى زورلاۋعا تىرىسقانى جانە ونىڭ بەلگىسىز باعىتقا قاشىپ كەتكەنى تۋرالى حابارلاما كەلىپ تۇسكەن.

تەكسەرىس جۇمىستارىن جۇرگىزۋ بارىسىندا 42 جاستاعى ايەل ب.مومىش ۇلى كوشەسىنىڭ بويىمەن جۇگىرۋگە شىققانى انىقتالدى. كەيىن ول سوڭىنان ەر ادامنىڭ ەرىپ كەلە جاتقانىن بايقاعان. جابىرلەنۋشىنىڭ ايتۋىنشا، كۇدىكتىنىڭ قولىندا ەكى پاكەت بولعان. بەلگىلى بولعانداي، كۇدىكتى ءوز ويىن ىسكە اسىرماق بولىپ، كيىمىن اۋىستىرىپ، جاسىرىنۋدى ويلاعان.

پوليسەيلەر كۇدىكتىنىڭ ىشىمدىك ىشكەن 20 جاستاعى جىگىت ەكەنىن انىقتادى. ول ماس كۇيىندە ايەلدى قۋىپ جەتىپ، ونى جەرگە قۇلاتىپ، دورەكى كۇش قولدانعان. كوشەدەگى كەزدەيسوق جولاۋشىلار ايەلدىڭ ايقايىن ەستىپ، كومەككە كەلگەن. وقيعا ورنىنان قاشىپ كەتكەن كۇدىكتىنى پوليسيا دەپارتامەنتىنىڭ جەكە قۇرامى ءىزىن سۋىتپاي ۇستادى.

ءقازىر اتالعان ءىس بويىنشا قىلمىستىق ءىس قوزعالىپ، تەرگەۋ امالدارى جۇرگىزىلۋدە. كۇدىكتى ۋاقىتشا ۇستاۋ يزولياتورىنا قامالدى.