قىزىلوردا وبلىسىندا "ارال تۇز" زاۋىتىنىڭ 1000-عا جۋىق  قىزمەتكەرى جۇمىسقا شىعۋدان باس تارتتى، دەپ حابارلادى استانا تەلەارناسى. 

اس تۇزىن وندىرۋشىلەر جالاقىنىڭ ازدىعىن ايتىپ نازارىلىق بىلدىرگەن. ايتۋلارىنشا، ولار تاڭنان كەشكە دەيىن قاپ كوتەرىپ، تىكەسىنەن تىك تۇرىپ جۇمىس ىستەيدى. ال الاتىن جالاقىلارى ماردىمسىز. 

– ءبىزدىڭ وكلادىمىز 55 مىڭ. وعان ەكولوگيالىق تولەم قوسامىز. سىياقىسى، تاعى-تاعىسىمەن 80 مىڭعا بارادى. ايلىقتى كوتەرىپ 100 پروسەنت وكلاد قىلسىن. بولدى باسقا تالابىمىز جوق. 13-ايلىق سۇراپ وتىرعان جوقپىز، – دەيدى زاۋىتتا دانەكەرلەۋشى بولىپ ىستەيتىن جالعاسحان سۇيىندىكوۆ. 

جينالعاندار ءوندىرىس ورنىندا جۇمىسشىلارعا جايلى جاعداي جاسالماعانىنا شاعىنادى. ارنايى كيىممەن قامتاماسىز ەتىلمەگەن. ءتىپتى تاماقتاناتىن ورىندارى دا جوق. 

– ەشقانداي ۋسلوۆيا جوق. تۋالەت جوق. 80 مىڭ تەڭگە ايلىق الامىز. مەن جەسىر ايەلمىن. سول 80 مىڭنىڭ ىشىندە ينۆاليد بالامدى اسىرايمىن، – دەدى دايىن ءونىم قاپشىسى نۇرگۇل قوندىبايەۆا  

"ارال تۇز" زاۋىتىنىڭ باسشىلىعى، ايلىقتى كوتەرۋگە قارسى ەمەستىگىن، ءبىراق ازىرگە قانشا پايىزعا كوتەرەتىنىن بىلمەيتىندەرىن، جۇمىستىڭ توقتاپ قالعانى  ماسەلەنى شەشۋگە كەرى اسەر ەتىپ تۇرعانىن ايتادى. 

– ناقتى ءقازىر ايتا المايمىن. ويتكەنى ەكى كۇن جۇمىسشىلارمەن ءجۇرمىن. ونى ەسەپتەپ قاراۋ كەرەك. حالىققا دا ايتىپ جاتىرمىن. سىزدەر جۇمىستى توقتاتساڭىزدار قانشا پايىزعا كوتەرۋ مۇمكىنشىلىگىن جويىپ جاتىرسىزدار دەپ، – دەيدى "ارال تۇز" اق پرەزيدەنتىنىڭ كەڭەسشىسى ايدىنبەك تاۋاساروۆ. 

ول ناقتى شەشىم قابىلداۋ ءۇشىن 10 كۇن قاجەت ەكەنىن ايتتى. ءبىراق نارازى جۇمسىشىلار "ماسەلە تۇبەگەيلى شەشىلمەسە، جۇمىسقا شىقپايمىز" دەپ وتىر.