ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ توعىز ايداعى الەۋمەتتىك-ەكونوميكالىق دامۋىنىڭ قورىتىندىسى، رەسپۋبليكالىق بيۋدجەتتىڭ اتقارىلۋى جانە مەملەكەت باسشىسىنىڭ تاپسىرماسىنا سايكەس ازىرلەنگەن ۇلتتىق جوبالار تانىستىرىلدى.

ۇلتتىق ەكونوميكا ءمينيسترى اسەت ەرعالييەۆ ەل ەكونوميكاسىنىڭ دامۋ كورسەتكىشتەرىن بايانداپ، قازاقستان ەكونوميكاسىندا سەنىمدى ءوسۋ بار ەكەنىن ايتتى. رەسپۋبليكادا بيىلعى جىلعى توعىز ايدا ينۆەستيسيا ءوسىمى 15،1 پايىزعا ارتقان. شىمكەنت قالاسى ينۆەستيسيالار تارتۋ بويىنشا وڭىرلەر اراسىندا العاشقى ورىندا كەلەدى. قالامىزدا وتكەن جىلدىڭ ءتيىستى كەزەڭىمەن سالىستىرعاندا ينۆەستيسيا تارتۋ كورسەتكىشى 38،8 پايىزعا وسكەن. «بارلىق كورسەتكىشتەر بويىنشا وڭ ءوسۋ اقمولا، الماتى، جامبىل، قوستاناي وبلىستارىندا جانە شىمكەنت قالالارىندا بايقالۋدا»، - دەدى ءا.ەرعالييەۆ.

تۇرعىن ءۇيدى پايدالانۋعا بەرۋ بويىنشا بارلىق وڭىردە وڭ ءوسىم بايقالعان. ەسەپتى كەزەڭدە ەلىمىزدە 10،4 ملن شارشى مەتر تۇرعىن ءۇي پايدالانۋعا بەرىلگەن. شىمكەنت قالاسىندا بۇل كورسەتكىش وتكەن جىلمەن سالىستىرعاندا 11،4 پايىزعا وسكەن.

قالامىزدا تۇراقتى جانە ساپالى ەكونوميكالىق ءوسىمدى قامتاماسىز ەتۋدە ينۆەستيسيالار تارتۋ بويىنشا بەلسەندى جانە ماقساتتى جۇمىستار جالعاسىن تاباتىن بولادى. وڭدەۋ ونەركاسىبى مەن قۇرىلىس سالاسىندا جوسپارلانعان ءوسۋ قارقىنى قامتاماسىز ەتىلىپ، ينفلياسياعا قارسى شارالار كەشەنى ءتيىمدى جۇزەگە اسىرىلادى. حالىقتى ۆاكسيناسيالاۋ جانە كاسىپكەرلىكتى قولداۋ شارالارىن ءتيىمدى ىسكە اسىرىلىپ، شيكىزاتتىق ەمەس ەكسپورتقا كەشەندى تۇردە قولداۋ كورسەتىلەدى.