شىمكەنت قالاسىنىڭ مامانداندىرىلعان اۋدانارالىق اكىمشىلىك سوتىندا داۋلاسۋشىلاردىڭ ەداۋىر بولىگى كەلىسىمگە كەلۋدە. 1 شىلدەدەن جۇمىسىنا كىرىسكەن سوتتا قارالىپ اياقتالعان ىستەردىڭ 18 پايىزى تاتۋلاسىپ، ورتاق مامىلەگە كەلگەن. بۇل تۋرالى شىمكەنت قالاسىنىڭ اقپاراتتىق كوممۋنيكاسيالىق ورتالىعىندا وتكەن بريفينگتە شىمكەنت قالاسىنىڭ مامانداندىرىلعان اۋدانارالىق اكىمشىلىك سوتىنىڭ ءتوراعاسى بەك امەتوۆ ءمالىم ەتتى.

اكىمشىلىك سوتتا مەملەكەتتىك ورگان مەن ازاماتتىڭ نەمەسە مەملەكەتتىك ورگان مەن زاڭدى تۇلعانىڭ اراسىنداعى داۋلار قارالادى. جاڭا اكىمشىلىك راسىمدىك-پروسەستىك كودەكستە وسى تاراپتاردىڭ سوت پروسەسىنىڭ كەز-كەلگەن ۋاقىتىندا بىتىمگە كەلۋگە مۇمىندىك جاسالعان. ال، بۇرىنعى زاڭنامالاردا مەملەكەتتىك ورگاندارمەن تاتۋلاسۋ قاراستىرىلماعان.

سوت ءتوراعاسى بىتىمگە كەلگەن ىستەردى مىسالعا كەلتىرە وتىرىپ: «ماسەلەن، وتكەن ايدا، ت. ەسىمدى تالاپ قويۋشى سوت ورىنداۋشىنىڭ ارەكەتىمەن كەلىسپەي، اليمەنت بويىنشا قارىز بەرەشەكتى ەسەپتەۋ تۋرالى قاۋلىنىڭ كۇشىن جويۋ جونىندەگى تالاپ ارىزىمەن سوتقا جۇگىنگەن. سوت بارىسىندا تاراپتار داۋدى ءوزارا مەدياسيا تارتىبىمەن رەتتەۋ تۋرالى كەلىسىم جاساسقىسى كەلەتىنىن مالىمدەپ، ونىڭ شارتتارىنا ساي جاۋاپكەر داۋلى قاۋلىنىڭ كۇشىن جويىپ، تالاپ قويۋشىنىڭ اليمەنت بويىنشا بەرەشەك قارىزىن قايتا ەسەپتەۋ تۋرالى جاڭا قاۋلى شىعارۋعا كەلىسكەن»-دەدى.

اكىمشىلىك سوتقا اعىمداعى جىلدىڭ شىلدە ايىنان بەرى 416 اكىمشىلىك تالاپ تۇسكەن. ولاردىڭ ىشىندە 114ء-ى سوت ورىنداۋشىلارىنىڭ ارەكەتتەرىنە شاعىمدانۋمەن بايلانىستى، 73ء-ى جەر داۋى، 64 سالىق زاڭناماسىنان جانە 60-ى مەملەكەتتىك ساتىپ الۋدان تۋىندايتىن داۋلار بويىنشا، قالعان بولىگى ت.ب. ساناتتارعا كىرەدى.

سوت جاڭا اكىمشىلىك راسىمدىك-پروسەستىك كودەكستى جۇرتشىلىققا ءتۇسىندىرۋ جۇمىستارىن بەلسەندى جۇرگىزىپ جالعاستىرۋدا. وسى باعىتتا سوت قىزمەتكەرلەرى 18 ماقالا جاريالاپ، تەلەارنالاردا 4 رەت سۇقبات بەرىپ، قالالىق سوتتىڭ سايتىنا، سوتتىڭ الەۋمەتتىك جەلىلەردەگى پاراقشالارىنا 40-تان استام باسپا ءسوز حابارلامالارىن جاريالاعان.

ودان بولەك، مەملەكەتتىك ورگانداردىڭ ۇجىمدارىمەن كەزدەسۋلەر ۇيىمداستىرىلۋدا. اتاپ ايتقاندا، قالالىق سوتتىڭ اكىمشىلىك ىستەر جونىندەگى سوت القاسىنىڭ جانە اكىمشىلىك سوتتىڭ سۋديالارى قالالىق سوتتا جانە مەملەكەتتىك كىرىستەر دەپارتامەنتىندە، ادىلەت دەپارتامەنتىندە، جەكە سوت ورىنداۋشىلار القاسىمەن «Nur Otan» پارتياسى فيليالىنىڭ عيماراتىنا بارىپ زاڭناما نورمالارىن تالقىلاۋ بويىنشا «دوڭگەلەك ۇستەل» ماجىلىستەرىن وتكىزدى.