شىمكەنت قالاسىنىڭ اباي اۋدانى اۋماعىندا 453 كوپقاباتتى تۇرعىن ءۇي بار. ونىڭ ىشىندە 374 كوپقاباتتى تۇرعىن ءۇي كوندومينيۋم نىسانى رەتىندە ادىلەت باسقارماسىنان تىركەۋدەن ءوتتى.

اۋداندا كوندومينيۋم وبەكتىسى رەتىندە تىركەۋدەن وتكەن كوپقاباتتى تۇرعىن ۇيلەردە مۇلىك يەلەرىنىڭ بىرلەستىگىن (ميب) جانە جاي سەرىكتەستىك (جس) قۇرۋعا بايلانىستى تۇرعىندارعا ءتۇسىندىرۋ جۇمىستارىنىڭ مەديا جوسپارى بەكىتىلىپ، بۇل بويىنشا تۇراقتى جۇمىستار جۇرگىزىلۋدە.

وسىعان وراي، بۇگىنگى تاڭعا دەيىن اۋدان اكىمشىلىگىنىڭ ۇيىمداستىرۋىمەن كوپقاباتتى ۇيلەردە ميب جانە جاي جس قۇرۋدىڭ تيىمدىلىگىن ءتۇسىندىرۋ ماقساتىندا تۇرعىندارمەن 521 جينالىس ۇيىمداستىرىلدى. سونىڭ ناتيجەسىندە، 374 كوپقاباتتى تۇرعىن ءۇيدىڭ كەلىسىم حاتتاماسى جاسالىپ، تۇرعىن ءۇي كولەمىنە شاققاندا ول 76،6 پايىزدى قۇراپ وتىر. ونىڭ ىشىندە، 289 كوپقاباتتى تۇرعىن ۇيدە جاي سەرىكتەستىك، 58-ىندە مۇلىك يەلەرىنىڭ بىرلەستىگى قۇرىلىپ، قالالىق ادىلەت دەپارتامەنتىندە تىركەلدى. سونداي-اق وتكەن اپتادا كوپقاباتتى تۇرعىن ءۇي تۇرعىندارىمەن 27 جينالىس وتكىزىلىپ، حاتتامالارىن ءتۇزىلدى.

بۇگىنگى تاڭعا دەيىن ءال-فارابي اۋدان اكىمشىلىگىنىڭ ۇيىمداستىرۋىمەن كوپقاباتتى ۇيلەردى باسقارۋدىڭ جاڭا نىسانىنا كوشۋ بويىنشا تۇرعىندارمەن 493 جينالىس ۇيىمداستىرىلدى. ناتيجەسىندە، 53 كوپقاباتتى تۇرعىن ۇيدە مۇلىك يەلەرىنىڭ بىرلەستىگى قۇرىلىپ، قالالىق ادىلەت دەپارتامەنتىندە تىركەلدى. سونداي-اق، 225 تۇرعىن ءۇي جاي سەرىكتەستىككە ءوتتى. قوسىمشا مۇلىك يەلەرىنىڭ بىرلەستىگىن قۇرۋ بويىنشا 33 كوپقاباتتى تۇرعىن ءۇيدىڭ كەلىسىم حاتتاماسى جيناقتالۋدا.

قازىرگى تاڭدا، قاراتاۋ اۋدانى اۋماعىندا ميب جانە ءجس-نى ءتۇسىندىرۋ بويىنشا تۇرعىندارمەن 78 كەزدەسۋ، 16 ونلاين جينالىس ۇيىمداستىرىلدى. اۋدان بويىنشا 9 ميب جانە 280 جس قۇرىلدى. سونىمەن قاتار، تۇسىندىرمە جۇمىستارى ناتيجەسىندە قالعان كوپقاباتتى ۇيلەردەن حاتتامالار جيناقتالىپ جاتىر.

ەڭبەكشى اۋدانىندا قازىرگى ۋاقىتتا 630 كوپقاباتتى تۇرعىن ءۇيدىڭ التاۋىنان ميب، 296-نان جس تۇرىندەگى كەلىسىم مەن 42 باس تارتۋ حاتتامالارى جيناقتالدى. سونىمەن قاتار، جالپى 503 ۇيگە ءتۇسىندىرۋ جۇمىستارى جۇرگىزىلدى. بيىلعى جىلدىڭ 10-21 قازان ارالىعىندا ەڭبەكشى اۋدانى اكىمى اپپاراتىنىڭ ماماندارى تاراپىنان 70 كوپقاباتتى تۇرعىن ۇيگە ءتۇسىندىرۋ جۇمىستارى اتقارىلىپ، قول جيناۋ ءۇشىن تۇرعىندارعا حاتتامالار بەرىلدى.

ءا.نۇرجىگىت ۇلى