ءبىلىم مينيسترلىگىنىڭ دەرەگى بويىنشا، قازاقستاندا 271 جەكەمەنشىك مەكتەپ بار. الماتىدا ولاردىڭ سانى 70-كە، ال نۇر-سۇلتاندا – 40-قا جۋىقتاعان. بۇل تۋرالى Forbes.kz باسىلىمىنىڭ قازاقستانداعى جەكەمەنشىك مەكتەپتەر تۋرالى، ونداعى ءبىلىم الۋ قۇنى جايلى ماتەريالدا ايتىلادى.
ەلدەگى جەكەمەنشىك مەكتەپتەر ۇسىناتىن باعا دياپازونى ءارتۇرلى. ايماقتىق جەردە ايلىق وقۋ قۇنى 50 000 تەڭگەدەن باستالىپ، الماتى، نۇر-سۇلتان مەگاپوليستەرىندە ميلليون تەڭگەدەن اسىپ جىعىلادى
1. QSI (نۇر-سۇلتان)
وقۋ اقىسى جونىندەگى رەيتينگتە ءبىرىنشى ورىندى نۇر-سۇلتان قالاسىندا ورنالاسقان QSI حالىقارالىق مەكتەبى يەلەنىپ وتىر. مۇندا ءبىرىنشى سىنىپتان 12-سىنىپقا دەيىن وقۋ اقىسى بىردەي، جىلىنا 26 000 اقش دوللارى، ايىنا ورتا ەسەپپەن 1،28 ملن تەڭگەدەن.
وقۋ تەك اعىلشىن تىلىندە جۇرگىزىلەدى. حالىقارالىق دەپ اتى ايتىپ تۇرعانداي نەگىزىنەن ەلدە جۇمىس ىستەيتىن شەتەلدىك ازاماتتاردىڭ، ديپلوماتتاردىڭ بالالارىنا ارنالعان مەكتەپ. دەگەنمەن، مۇندا قازاقستان ازاماتتارىنىڭ دا بالالارى ءبىلىم الادى. بالا سانى دا شاعىن، 300-دەن اسادى.
نەگىزىن قالاۋشى/قۇرىلتايشىسى كوممەرسيالىق ەمەس "Quality Schools International" ۇيىمى. نۇر-سۇلتان قالاسىنداعى مەكتەپ 2005 جىلى اشىلعان. نۇر-سۇلتان QSI حالىقارالىق مەكتەبى 2011 جىلى ورتا اتلانتيكالىق شتاتتار ءبىلىم مەكەمەلەرى اسسوسياسياسىنىڭ (Middle State Association of Colleges and Schools) اككرەديتاسياسىنان وتكەن. وقۋ امەريكالىق AP Capstone Diploma Program باعدارلاماسىنا نەگىزدەلگەن، بۇل – تۇلەكتەرگە اقش پەن كانادا ۋنيۆەرسيتەتتەرىنە وقۋعا تۇسۋىنە مۇمكىندىك بەرەدى.
2. QSI (الماتى)
ەكىنشى ورىندى الماتى قالاسىندا ورنالاسقان حالىقارالىق QSI مەكتەبى الادى. مۇنداعى وقۋ اقىسى، ەلورداداعىدان ارزانداۋ، ايىنا ورتا ەسەپپەن 1،08 ملن تەڭگە. وقۋشى سانى – 450.
"Quality Schools International" ۇيىمى 1993 جىلى اشىلعان. ورتا اتلانتيكالىق شتاتتار ءبىلىم مەكەمەلەرى اسسوسياسياسىنىڭ اككرەديتاسياسى بويىنشا 1999 جىلدان بەرى ءبىلىم بەرىپ كەلەدى. مەكتەپتە قازىرگى تاڭدا شەتەلدىك جانە جەرگىلىكتى 32 ۇلت وكىلى ءبىلىم الادى. 2020 جىلى 43 وقۋشى مەكتەپ تۇلەگى بولعان. مەكتەپتە بالالاردىڭ وقۋ باعدارلاماسىن جەڭىل مەڭگەرۋىنە جانە قاۋىپسىزدىگىنە باسا ءمان بەرىلەدى. مەكتەپتە شىعارماشىلىق جانە عىلىمي ۇيىرمەلەر بار. مۇندا سولتۇستىك امەريكا، ەۋروپا، اۆستراليا، جاڭا زەلانديا جانە الەمنىڭ وزگە دە ەلدەرىنەن كەلگەن ماماندار جۇمىس ىستەيدى.
3. Haileybury (الماتى)
رەيتينگتە ءۇشىنشى ورىندى Haileybury Almaty جانە Haileybury Astana مەكتەپتەرى يەلەنگەن. مۇندا دايىندىق سىنىبىنان باستاپ 13-سىنىپقا دەيىن ءبىلىم بەرىلەدى. سوندىقتان وقۋ اقىسى سىنىپتارعا قاراي ءبولىنىپ وتىرادى. مىسالى، دايىندىق سىنىبى جىلىنا 5،6 ملن تەڭگە، 3-6 سىنىپ وقۋشىلارى ءۇشىن 9،7 ملن تەڭگە، 10–13 سىنىپتار ءۇشىن 12،6 ملن تەڭگە. ورتا ەسەپپەن وقۋ اقىسى ايىنا ءبىر بالا ءۇشىن شامامەن 1 ملن تەڭگە.
Haileybury مەكتەبى بەيكوممەرسيالىق بولعاندىقتان تۇسكەن پايدانى قۇرىلتايشىلار ءوزارا بولىسپەيدى. مەكتەپ شىعىندارىنان قالعان قاراجات ونى دامىتۋ مەن جەتىلدىرۋگە جۇمسالادى، شىعىنداردىڭ باسىم بولىگى بريتان فۋنتى مەن دوللارعا تاۋەلدى. سوندىقتان دا وقۋ اقىسى مۇندا فۋنت ستەرلينگپەن بەرىلەدى.
Forbes Kazakhstan باسىلىمىنىڭ ەسەپتەۋىنشە، مەكتەپتىڭ جىلدىق كىرىسى – شامامەن 5 ملرد تەڭگە. وقۋشىلار شەت ەلدەردىڭ جانە قازاقستانداعى ۇزدىك جوعارعى وقۋ ورىندارىنا تۇسۋگە مۇمكىندىك بەرەتىن "A levels" باعدارلاماسى بويىنشا دايىندالادى. وقۋشىلار سانى – الماتىدا 730، نۇر-سۇلتاندا – 550. وقۋ ورنىندا بىلىكتىلىگى جوعارى شەتەلدىك 60 پەداگوگ جۇمىس ىستەيدى، نەگىزىنەن ۇلىبريتانيا ازاماتتارى.
2021 جىلى مەكتەپتى 23 تۇلەك ءتامامداعان ولاردىڭ باسىم كوپشىلىگى كەمبريدج، يەل، كولۋمبيا، تورونتو، امستەردام، برايتون، داربون ۋنيۆەرسيەتتەرى سەكىلدى شەتەلدىك بەدەلدى وقۋ ورىندارىنا تۇسكەن. Haileybury Almaty وقۋشىلارى وتكەن جىلى حالىقارالىق جانە رەسپۋبليكالىق بەدەلدى وليمپيادا جۇلدەگەرلەرى اتانعان. مەكتەپ وقۋشىلارىنىڭ ءبىرى استرونوميا مەن استروفيزيكا بويىنشا الەمدىك ونلاين بايقاۋدا قازاقستاننىڭ نامىسىن قورعادى.
Haileybury Almaty 2008 جىلى ۇلىبريتانيالىق Haileybury and Imperial College-بەن سەرىكتەستىكتە اشىلدى. بەيكوممەرسيالىق ءبىلىم بەرۋ جوباسىن بولات وتەمۇراتوۆتىڭ "اسىل ميراس" قايىرىمدىلىق قورى، سەرجان جۇماشوۆ، نۇرجان سۇبحانبەردين، ايدان كارىبجانوۆ، مارعۇلان سەيسەمباي، الفيا قۋانىشيەۆادان تۇراتىن ءبىر توپ قازاقستاندىق كاسىپكەر قارجىلاندىردى.
Haileybury استانا مەكتەبىن پرەزيدەنت نازاربايەۆ 2011 جىلى اشتى. مەكتەپ وقۋشىلارعا IB World باعدارلاماسى بويىنشا ءبىلىم بەرەدى.
4. Kazakhstan International School (الماتى)
Kazakhstan International School (الماتى) رەيتينگىمىزدىڭ ءتورتىنشى ورنىن يەلەنىپ وتىر. وقۋ اقىسى بۇل مەكتەپتە ورتا ەسەپپەن ايىنا 874 مىڭ تەڭگە. وقۋشى سانى دا كوپ ەمەس – 400.
ءاۋ باستا مونتەسسوري بالاباقشاسى رەتىندە قۇرىلعان مەكتەپتىڭ قۇرىلتايشىسى/نەگىزىن قالاۋشى – دەنيەل گۋناسيلان، Gateway Ventures LTD كومپانياسى، سينگاپۋر. وقۋ تەك اعىلشىن تىلىندە جۇرەدى. وزگە دە حالىقارالىق مەكتەپتەر سەكىلدى مۇندا دا حالىقارالىق باكالاۆريات (IB) ءۇش باعدارلاما بويىنشا ءبىلىم بەرەدى: PYP (مەكتەپكە دەيىنگى جانە باستاۋىش ءبىلىم)، MYP (نەگىزگى ورتا ءبىلىم)، DP (ديپلوم باعدارلاماسى). 2020–21 وقۋ جىلى مەكتەپ وقۋشىلارى Space Foundation (اقش) جانە تمد ەلدەرى حالىقارالىق باكالاۆريات مەكتەپتەرى اسسوسياسياسى وتكىزگەن حالىقارالىق سايىستاردان جۇلدەلى ورىندار الدى. مۇعالىمدەر قۇرامىندا شەتەلدىك جانە وتاندىق ماماندار بار.
5. Spectrum (نۇر-سۇلتان)
نۇر-سۇلتان قالاسىندا ورنالاسقان حالىقارالىق Spectrum مەكتەبى دە وقۋ اقىسى قىمبات وقۋ ورىندارىنىڭ ءبىرى رەتىندە الدىڭعى بەستىككە كىرەدى. ءبىرىنشى سىنىپ پەن 12-سىنىپ ارالىعىندا باعالار 5،3 ملن تەڭگەدەن 7 ملن تەڭگەگە دەيىن. ايىنا ورتا ەسەپپەن 650 مىڭ تەڭگە.
مەكتەپتىڭ قۇرىلتايشىسى/نەگىزىن قالاعان «BILIM ORDA» قوعامدىق قورى. Spectrum وتاندىق جانە بريتاندىق ءبىلىم باعدارلاماسىن ۇسىناتىن مەكتەپ. 2011 جىلى Spectrum كەمبريدجدىڭ حالىقارالىق مەكتەبى جانە ەمتيحان ورتالىعى بولدى، IGCSE جانە A Level بىلىكتىلىكتەرىن ۇسىنادى. سول جىلى Spectrum حالىقارالىق مەكتەپ كەڭەسىنىڭ تۇراقتى مۇشەسى بولدى ءجان تمد-دا اككرەديتاسيادان ءوتتى. مەكتەپتە ءبىلىم الۋ ءۇشىن ۇمىتكەرلەر اعىلشىن تىلىندە سAT4 (Cognitive Abilities Test) جۇيەسىمەن وتكىزىلەتىن ونلاين-تەست تاپسىرادى. وندا لوگيكا، ماتەماتيكا جانە اعىلشىن ءتىلى بويىنشا سۇراقتار بەرىلەدى. Spectrum تۇلەكتەرى الەمنىڭ ۇزدىك ۋنيۆەرسيتەتتەرىندە وقيدى.
6. High Tech Academy (الماتى)
التىنشى ورىنعا جايعاسقان الماتىداعى ايرىقشا جەكە مەنشىك مەكتەپتەردىڭ ءبىرى – High Tech Academy. مۇندا جىلدىق وقۋ اقىسى 5،04 ملن تەڭگە، ءبىر رەتتىك جارنا 150 000 تەڭگە. ايىنا 560 مىڭ تەڭگەدەن. سونداي-اق، وقۋ ماتەريالدارى ءۇشىن دە 150 مىڭ تەڭگە كولەمىندە اقى الۋ قاراستىرىلعان.
مەكتەپتىڭ قۇرىلتايشىسى/نەگىزىن قالاۋشى – بەلگىلى بيزنەسمەن ەركىن تاتىشيەۆ. 2017 جىلى اشىلعان High Tech Academy جوبالىق ءبىلىم بەرۋ جانە فين مەكتەپتەرىنىڭ پەداگوگيكاسى قاعيداتتارىنا نەگىزدەلگەن. 2019 جىلدىڭ ماۋسىم ايىندا High Tech Academy متس (Mastery Transcript Consortium) مۇشەسى بولدى، 2020 جىلى (CIS) حالىقارالىق مەكتەپتەر كەڭەسىنىڭ اككرەديتاسياسىنان ءوتىپ، جاڭا عيماراتقا كوشتى. وقۋ باعدارلاماسى اعىلشىن، ورىس جانە قازاق تىلدەرىندە.
7. ميراس (الماتى)
حالىقارالىق «ميراس» مەكتەبى رەيتينگتە جەتىنشى ورىندا تۇر. دەگەنمەن، ەسكەرە كەتەتىن جايت، «ميراس» مەكتەبى شەتەلدىك جانە وتاندىق وقۋشىلار ءۇشىن ەكى ءتۇرلى وقۋ اقىسىن ۇسىنادى. مىسالى، شەتەلدىكتەر ءۇشىن وقۋ اقىسى 18 580 دوللاردان 27 730 دوللار ارالىعىندا، وعان 2150 دوللار تۇراتىن ءبىر رەتتىك جارنانى قوسىڭىز. «ميراس» مەكتەبىندە ءبىلىم الۋ ءۇشىن شەتەلدىكتەر ورتا ەسەپپەن جىلىنا 25 000 دوللار نەمەسە ايىنا 1،16 ملن تەڭگەدەن تولەيدى. الماتىداعى فيليالىنداعى ايلىق وقۋ اقىسى 550 مىڭ تەڭگە كولەمىندە. نۇر-سۇلتان قالاسىندا ورنالاسقان «ميراس» مەكتەبىندەگى باعا الماتى مەكتەبىنە قاراعاندا ارزانداۋ. ايىنا ورتا ەسەپپەن 435 مىڭ تەڭگە كولەمىندە. بۇل مەكتەپتە دە شەتەلدىك ازاماتتار ءۇشىن اقش دوللارىمەن جەكە تاريف ۇسىنىلادى. وتاندىق جانە تمد-دان كەلگەن وقۋشىلار ءۇشىن تاريفتەر تىلگە قاراي بولىنبەيدى، سىنىپتار بويىنشا ەرەكشەلەنەدى.
الماتىداعى مەكتەپتە اعىلشىن تىلىندە وقيتىن باستاۋىش مەكتەپ وقۋشىسى جىلىنا 4،356 ملن تەڭگە تولەيدى، ال قازاق جانە ورىس تىلىندەرىندە ءبىلىم الۋ ءۇشىن 3،807 ملن تەڭگە. 4،054 ملن تەڭگە تولەپ قازاقستاندىق باعدارلاما بويىنشا 11-سىنىپتى اياقتاۋعا بولادى، بولماسا 5،940 ملن تەڭگەمەن IB حالىقارالىق باعدارلاماسى بويىنشا ديپلوم قورعاۋعا بولادى. ءبىر رەتتىك جارنا 400 مىڭ تەڭگەنى قۇرايدى.
مەكتەپتىڭ نەگىزىن قالاۋشى/قۇرىلتايشىسى – نۇرسۇلتان نازاربايەۆتىڭ ءبىلىم بەرۋ قورى. ءبىلىم وشاعى حالىقارالىق باكالاۆريات (IB) بويىنشا تىركەۋدەن وتكەن، حالىقارالىق مەكتەپتەر كەڭەسىنىڭ اككرەديتاسياسىن يەلەنگەن، ECIS، UNESCO، IBSA ۇيىمدارىنىڭ مۇشەسى. تۇلەكتەرى نازاربايەۆ ۋنيۆەرسيتەتىنىڭ جانە وزگە دە شەتەلدىك بەدەلدى وقۋ ورىندارىنىڭ گرانتىن يەلەنگەن.
8. Galaxy (الماتى)
الماتى قالاسىنداعى حالىقارالىق Galaxy مەكتەبىن رەيتينگتە توعىزىنشى ورىننان كورۋگە بولادى. مۇندا جىلدىق وقۋ اقىسى بارلىق سىنىپتار ءۇشىن 3،5 ملن تەڭگە، ايىنا ورتا ەسەپپەن 388 مىڭ تەڭگە كولەمىندە. قۇرىلتايشىسى حالىقارالىق BILIM ORDA قوعامدىق قورى، مەكتەپ 2014 جىلى اشىلعان. وقۋشى سانى – 352.
«Galaxy» مەكتەبى 2016 جىلدىڭ جەلتوقسان ايىندا بريتاندىق حالىقارالىق مەكتەپتەر كەڭەسىنىڭ «COBIS» مۇشەسى اتاندى. 2015 جىلدىڭ 27 قازانىندا كەمبريدج حالىقارالىق مەكتەبى اتاعىنا يە بولدى (Cambridge Assessment International Education)، ياعني وقۋشىلارعا كەمبريدج حالىقارالىق باعدارلامالارى مەن ەمتيحاندارىن رەسمي تۇردە ۇسىنۋ قۇقىعىنا يە بولدى. وقۋشىلار «Cambridge Primary»، «Cambridge Lower Secondary»، «Cambridge Upper Secondary» (IGCSE) جانە «Cambridge Advanced» (AS/A Levels) سىندى باعدارلامالارمەن وقي الادى. Galaxy مەكتەبىندە جەڭىلدىكتەر، شاعىن گرانتتار دا ۇسىنىلادى. ال مەكتەپ تۇلەكتەرى – شەتەلدىك بەدەلدى جوو ستۋدەنتتەرى.
9. TAMOS Education (الماتى)
TAMOS Education فيزيكا-ماتەماتيكا مەكتەبى. مەكتەپتىڭ الماتى قالاسىندا لينگۆيستيكالىق، فيزيكا-ماتەماتيكالىق دەپ بولىنەتىن فيليالدارى بار. تيىسىنشە، باعالارى دا ءارتۇرلى. ماسەلەن، دايارلىق سىنىبىنا بەرۋ ءۇشىن باعا جىلىنا 1 455 000 تەڭگەدەن باستالادى. ءبىرىنشى سىنىپتان باستاپ فيزيكا-ماتەماتيكالىق باعىتتاعى مەكتەپتە وقىتۋ ءۇشىن 2 ملن تەڭگەگە جۋىق قاراجات تولەۋىڭىز كەرەك، ال لينگۆيستيكالىق باعىتتاعى مەكتەپ قۇنى ودان جوعارى، 2 205 000 — 2 295 000 ارالىعى. ەڭ قىمبات باعا Cambridge بولىمىندە، مۇندا 8 سىنىپقا دەيىن وقىتۋ ءۇشىن 3 960 000 تەڭگە، ال جوعارى سىنىپتار ءۇشىن 4 410 000 تەڭگە تولەۋ كەرەك. جالپى مەكتەپتەر جۇيەسىندەگى ورتاشا ايلىق باعا 300–500 مىڭ تەڭگە ارالىعىندا.
1998 جىلى الماتى قالاسىندا قۇرىلعان بەيكوممەرسيالىق مەكتەپ. قۇرىلتايشىلارى/نەگىزىن قالاۋشىلار: مۇرات وماروۆ، داۋرەن قاۋپىنبايەۆ، مارعۇلان سەيسەمباي، «Asadel Partners» ج ش س. وتكەن جىلى كەمبريدج حالىقارالىق مەكتەبى (CIS) مارتەبەسىن العان. IELTS، Starters، Flyers، Movers، KET، PET، English Advanced سىندى كەمبريدج ەمتيحاندارىن تاپسىرۋ بويىنشا رەسمي ورتالىق. مەكتەپ وزىندىك وقىتۋ باعدارلاماسى بويىنشا جۇمىس ىستەيدى. وندا ماتەماتيكا مەن جاراتىلىستانۋ عىلىمدارى اعىلشىن تىلىندە حالىقارالىق باعدارلاما بويىنشا وقىتىلادى. وقۋ حالىقارالىق كەمبريدج باعدارلاماسى بويىنشا وتەدى. ءبىلىم ورداسى جانىنان 2016 جىلى لينگۆيستيكالىق مەكتەپ اشىلعان. وندا بالالار ەكى شەت ءتىلىن وقيدى – اعىلشىن ءتىلى جانە 5-سىنىپتان باستاپ جۇڭگو ءتىلى. وتىزعا جۋىق ۇلت وكىلى ءبىلىم الاتىن ءبىلىم ورداسىندا اعىلشىن تىلىنەن نەگىزىنەن شەتەلدىك مۇعالىمدەر وقىتادى. وسى ماقساتتا ەلۋگە جۋىق شەتەلدىك وقىتۋشى شاقىرىلعان. وقۋشى سانى – 2700. ساباقتار قازاق، ورىس، اعىلشىن تىلدەرىندە جۇرەدى.
10. شوقان ءۋاليحانوۆ اتىنداعى جەكەمەنشىك مەكتەپ (الماتى)
رەيتينگتەگى وندىقتى قورىتىندىلايتىن «شوقان ءۋاليحانوۆ اتىنداعى جەكەمەنشىك مەكتەپ»، الماتى قالاسىندا ورنالاسقان. 800 ورىندىق مەكتەپ قازاق جانە ورىس تىلدەرىندە ءبىلىم بەرەدى. وقۋ اقىسى جىلىنا 2،7 ملن تەڭگە نەمەسە ايىنا 300 مىڭ تەڭگە، مەكتەپ جارناسى 300 مىڭ تەڭگە.
قۇرىلتايشىسى/نەگىزىن قالاۋشى كەڭەس راقىشيەۆ، اسەل تاسماعامبەتوۆا. مەكتەپ 2020 جىلدىڭ شىلدە ايىندا اشىلعان. مەكتەپ قازاقستان تاريحىن زەردەلەۋگە باسا ءمان بەرەدى. ەڭ جوعارعى دەڭگەيدە وقىتۋ مەن ءبىلىم بەرۋ – مەكتەپتىڭ پەداگوگتار ۇجىمى قىزمەتىنىڭ باستى ۇستانىمى. مۇندا ءار وقۋشىنىڭ جەكە دامۋىن قاداعالاۋعا مۇمكىندىك بەرەتىن، ءبىلىم دەڭگەيىن باعالاۋدىڭ وبەكتيۆ ءارى ايقىن جۇيەسى ەنگىزىلگەن. وقىتۋ بارىسىندا قازاقستاندىق جانە حالىقارالىق تاجىريبەدەگى ءبىلىم بەرۋ تەحنولوگيالارى
پىكىر قالدىرۋ