شىمكەنت قالاسى ءال-فارابي اۋدانىنىڭ اكىمى راشيد مىڭبايەۆ «SHANYRAQ» ورتالىعىنا بارىپ، جۇمىسىمەن تانىستى.
اشىلعانىنا نەبارى ءبىر جىل بولعان ورتالىق قالاداعى ءالسىز توپتاردىڭ الەۋمەتتىك كارتاسىن دايىنداۋدا ەلەۋلى ىستەر اتقارىپ كەلەدى.
الەۋمەتتىك ماسەلەلەر جونىندە قالانىڭ ءتورت اۋدانىمەن تىعىز بايلانىس ورناتقان ورتالىقتا جاس انالارمەن بىرگە اجەلەر جانە جالعىزىلىكتى اكەلەردىڭ دە مەكتەبى جولعا قويىلعان.
ورتالىق مەڭگەرۋشىسى ابيبۋللا قالىمبەتتىڭ سوزىنشە، بۇل جەردە اتالعان توپتاعى ازاماتتار كۇندەلىكتى باس قوسىپ، ءوزىن مازالاپ جۇرگەن ماسەلەلەردى ورتاعا سالادى. سەبەبى مۇندا پسيحولوگيالىق، الەۋمەتتىك جانە قۇقىقتىق كەڭەس بەرۋ قىزمەتى اقىسىز جۇرگىزىلەدى.
ءتىپتى بۇل ورتالىقتا بالا اسىراپ الۋ جونىندە كەڭەس الۋ مەن وزگە كاسىپ يگەرۋگە جانە جۇمىسپەن قامتۋ تۇرعىسىنان دا جاردەم الۋعا مۇمكىندىك بار. ءبىر جىل ىشىندە 9 859 ازامات پسيحولوگيالىق، قۇقىقتىق، ااك-كە قۇجات تاپسىرۋ، ءۇي كەزەگىنە تۇرۋ بويىنشا كەڭەس العان.
بۇدان وزگە، كوپبالالى جانە ناۋقاس بالا كۇتىمىندەگى 143 انا تىگىن، ماسساج، سمم كۋرستارى مەن كونديتەرلىك شەبەرلىك ساعاتىنا قاتىسىپ، ءقازىر ءوز كاسىبىن دوڭگەلەتىپ وتىر.
– اجىراسۋ – قوعامنىڭ ەڭ ۇلكەن ماسەلەنىڭ ءبىرى. كۇيزەلىسكە ۇشىراعان اتا-انالار پسيحولوگيالىق كومەككە ءزارۋ. ال تولىق ەمەس وتباسىدا وسكەن بالانىڭ كەلەشەكتە قوعامعا ءسىڭىسۋى، ادامدارمەن ءتىل تابىسۋى قيىنعا سوعادى. جاسقانشاق بولعان بالالاردىڭ وزدەرى دە تۇراقسىز ءارى دەپرەسسياعا جاقىن كەلەدى. وسى ماسەلەنىڭ الدىن الۋ ءۇشىن «SHANYRAQ» ورتالىعى اشىلىپ، يگى ىستەر اتقارىلۋدا. الداعى ۋاقاتتا دا سىزدەرمەن ەتەنە جاقىن جۇمىس ىستەيتىن بولامىز، - دەدى راشيد مامىت ۇلى.
پىكىر قالدىرۋ