بايدەن اقش ينفراسترۋكتۋراسىنا 1،2 ترلن دوللار ينۆەستيسيا قۇيۋ تۋرالى زاڭعا سالتاناتتى جاعدايدا قول قويدى.

بۇل – وتە قۇندى جاڭالىق. سەبەبىن شامام كەلگەنشە ءتۇسىندىرىپ كورەيىن. بىرىنشىدەن، اقش-تا جولدار، كوپىرلەر، تەمىرجولدار، لەپ، باسقا دا تولىپ جاتقان ينفراسترۋكتۋرالار بار. جوق ەمەس، بار! قازاقستانداعىداي ماڭعىستاۋ وبلىسىنا الماتى، استانا تۇگىلى قىزىلوردا، اقتوبە وبلىستارىنا ءالى كۇنگە شەيىن اۆتوموبيل جولى جوق ەمەس، بارساڭ جاقىندا سالىنعان اتىراۋ وبلىسى جولى ارقىلى عانا باراسىڭ دەگەندەي. نەمەسە ءۇستىرتتىڭ شاڭىن اسپانعا شىعارىپ قارا جولمەن تارتاسىڭ.

ماسەلە مىنادا – ول ينفراسترۋكتۋرانىڭ ءبارى دە ەسكىرگەن، توزىعى جەتكەن. ەسكىرگەن دەگەندە بىزگە تاعى دا كوز الدىمىزعا شەگەسى بىلاڭداپ، اعاشتارى اياق باسقان سايىن سىقىرلاپ تۇراتىن اعاش كوپىرلەر ەلەستەمەۋى كەرەك. جوق، ولاردىڭ ءبارى دە كۇتىپ-باپتالعان، سىرلانعان، مەرزىمىندە انكەرلىك بولتتارى اۋىستىرىلىپ تۇرادى. ءالى دە ءجۇز جىل تۇراتىنى انىق. ولار مورالدىق تۇرعىدان ەسكىرگەن، قازىرگى تالاپقا جاۋاپ بەرمەيدى، ەنەرگيانى كوپ تالاپ ەتەدى. سوندىقتان ولاردى جاڭالاۋ قاجەت.

ەكىنشىدەن، زامان تالابى وزگەرگەن. قۇرىلىس سالاسى قارىشتاپ العا كەتكەن. قانشاما جاڭا ماتەريالدار بار، جوبالاۋ جۇمىستارى مۇلدەم باسقاشا، از شىعىنمەن ۇلكەن قولجەتىمدىلىك، تيىمدىلىككە جەتكىزەتىن جولدار كوپ. كەڭ جولاقتى ينتەرنەت پايدا بولعان، وپتو-ۆولوكوندى كابەلدەر، ەل بويىنشا قورعاسىن قۇبىرلاردى اۋىستىرۋ، ەلەكترمەن زاريادتايتىن ستانسيالار سالۋ، ت.س.س.

بۇل جۇمىستار امەريكا قوعامىندا كوپتەن بەرى تالقىلانىپ كەلە جاتقانمەن دە بايدەنگە دەيىنگى ءبىردى-بىر پرەزيدەنتتىڭ قولىنان كەلمەپتى. ترامپ تا قانشا جانتالاسقانمەن ۇسىنىسىن كونگرەسستە وتكىزە الماعان. ول وتكىزە المايتىن دا ەدى. سەبەپ؟ سەبەبى ول جالپى ەل ءۇشىن قىزمەت جاسايتىن ادام ەمەس، تەك ءوز بيزنەسى تۇرعىسىنان عانا ۇسىنىس جاسادى، حالىقتى ەكى جىككە – رەسپۋبليكاشىلدار مەن دەموكراتتار دەپ ءبولدى، سوندىقتان وعان دەموكراتتار داۋىس بەرە مە؟ ال بايدەن كەرىسىنشە، كوگرەسستە بىرنەشە رەسپۋبليكاشىلداردىڭ دا كوزدەرىن جەتكىزە الدى. ءسويتىپ زاڭ كونگرەسستەن ءوتتى. ەندى نە بولىپ جاتقانى ءتىپتى قىزىق – ترامپ ويباي سالىپ جاتىر، داۋىس بەرگەن رەسپۋبليكاشىلداردى قۋدالاۋ، ولاردىڭ وتباسىلارىنا ءتيىسۋ، ت.س.س. باستالدى. قاراڭىزشى، بىزدەگى ديكتاتوردان نە ايىرماسى بار؟ ويتكەنى بايدەن ەشكىمنىڭ قولىنان كەلمەگەندى جاسادى.

مۇنىڭ تاعى قانداي سالدارى بار؟ سالدارى ءتىپتى كەرەمەت – مۇناي، گاز پايدالانۋ كۇرت ازايادى. پۋتين زارلاپ جىلاپ قويا بەرگەنى سول. بىردە ءبىزدىڭ باستى پۋتينگە بارىپ، ەكەۋى "الەمدە ءبارىبىر مۇناي-گازدى ازىرگە پايدالانادى، قىسىلۋعا ەش نەگىز جوق" دەپ ءماز بولىسىپ وتىرعانى ەستە قالىپتى. سەنبەسەڭىزدەر رف باق-تارىن قاراپ وتىرىڭىزدار – وسى تاريحي وقيعا تۋرالى ماقالا شىعار ما ەكەن، شىقپاس پا ەكەن؟ راسىندا دا اقش مۇناي-گازدى پايدالانۋدان الدىڭعى قاتارلى ەلدەردىڭ ءبىرى ەكەن، ەندى ونى تۇتىنۋ بىرتىندەپ ازايا بەرمەك.

تاعى ءبىر سالدارى – اقش-تا قۇرىلىس كومپانيالارىنىڭ اكسياسى اسپانداي باستادى. اقشاسى بارلار قور بيرجاسىنا قاتىسىپ پايداعا كەنەلىپ جاتىر. ءبىراق ەندى بۇل تيىن ساناپ وتىرعان قاراپايىم قازاقتارعا قاتىسى جوق، سوندىقتان كوڭىل-كۇيلەرىڭىزدى تۇسىرمەي-اق قويايىن. وعان قاتىسۋشىلار دا كەمى 50-100 مىڭ دوللارى بارلار. ياعني ولار ودان سايىن بايي تۇسۋدە. قايتەمىز ەندى، قولىمىزدان كەلمەسە.

قۋانىش ەدىلحانتەگى

حالىقارالىق شولۋشى