قازاقستان رەسپۋبليكاسى پرەمەر-مينيسترى مىندەتىن ۋاقىتشا اتقارۋ ءاليحان سمايىلوۆقا جۇكتەلدى.
ۇكىمەت مۇشەلەرى ۇكىمەتتىڭ جاڭا قۇرامى بەكىتىلگەنگە دەيىن ءوز مىندەتتەرىن اتقارۋدى جالعاستىرا بەرەدى.
2 قاڭتاردا جاڭاوزەندە گاز قىمباتشىلىعىنان باستالعان حالىق تولقۋى رەسپۋبليكانىڭ كوپتەگەن وڭىرلەرىن جاپپاي شارپىپ، كەشە كەشكە الماتى حالقى نارازىلىققا شىققان. الەۋمەتتىك ماسەلەدەن تۋعان حالىق نارازىلىعى بىرتىندەپ ساياسيلانا ءتۇسىپ، ۇكىمەت پەن ن.نازاربايەۆ وتستاۆكاسى تۋرالى تالاپتار قويىلدى.
الماتىدا الاڭ مەن كوشەگە شىققان ونداعان مىڭ ادام اراسىندا تارتىپسىزدىككە بارعاندار، پوليسيا كولىكتەرىن ورتەپ، عيماراتتاردى قيراتقاندار دا بولدى. پوليسيا ادامداردى الاڭنان قايتارۋ ءۇشىن كوزدەن جاس اعىزاتىن، داۋسى قاتتى شىعاتىن، ءيىسى وكپەنى قاباتىن گراناتالار قولداندى. ازاماتتار مەن پوليسيا قاقتىعىسىنان جارالانعاندار بار.
ق.توقايەۆ ماڭعىستاۋ وبلىسى مەن الماتى قالاسىندا ەكى اپتاعا توتەنشە جاعداي جاريالادى. كوپتەگەن شەكتەۋ ەنگىزىلدى.
قازاقستاندا 2021 جىلعى جاپپاي قىمباتشىلىق سالدارىنان حالىق تۇرمىسى قاتتى تومەندەپ كەتتى. ەلدىڭ ءار ايماعىندا، الەۋمەتتىك جەلىدە دۇركىن-دۇركىن ۇكىمەت وتستاۆكاسى تۋرالى قوزعالعان اڭگىمەلەر، توقايەۆتان مامين ۇكىمەتىن تاراتۋ تۋرالى بەلسەندىلەر تالابى بيلىك تاراپىنان ەسكەرىلمەي كەلدى.
پىكىر قالدىرۋ