جاڭاوزەندە سۇيىتىلعان گاز قۇنىنىڭ قىمباتتاۋىنا بايلانىستى باستالعان حالىق نارازىلىعى تۋرالى BBC، Reuters، AFP، The Guardian جانە France Press سياقتى شەتەلدىك ءىرى باسىلىمدار حابارلادى.

"قازاقستاندا گاز باعاسىنىڭ كوتەرىلۋىنە بايلانىستى نارازىلىق شەرۋلەرى زورلىق-زومبىلىققا ۇلاسىپ، ەلدىڭ كەيبىر ايماقتارىندا ەكى اپتاعا توتەنشە جاعداي جاريالادى" دەپ جازدى BBC. سونىمەن قاتار، ەلدىڭ بىرنەشە ايماعىندا ءىرى دەمونستراسيالار وتكەنىن حابارلادى.

"ەلدىڭ ەڭ ۇلكەن قالاسى الماتىدا كولىكتەر ورتەنگەننەن كەيىن پوليسيا جۇرتتى اۋىزدىقتاۋ ءۇشىن كوزدەن جاس اعىزاتىن گاز قولداندى" دەپ جازدى Reuters اگەنتتىگى.

France Press اگەنتتىگى سەيسەنبىگە قاراعان ءتۇنى الماتىدا شەرۋگە مىڭداعان ادام جينالعانىن، قاقتىعىس كەزىندە ءتارتىپ ساقشىلارى جارالانعانىن حابارلادى.

ال، The Guardian گازەتى "ورتالىق ازيانىڭ اۆتوريتارلىق ەلىنىڭ كوپ بولىگىندە حابار الماسۋ قولدانبالارى بۇعاتتالدى جانە ءموبيلدى ينتەرنەت ءوشتى" دەپ جازدى.

"1991 جىلى كەڭەس وداعى ىدىراعان تۇستا تاۋەلسىزدىگىن جاريالاعان قازاقستاندا كەلىسپەۋشىلىكتەر مەن نارازىلىقتار سيرەك بولادى. الايدا، ماڭعىستاۋ وبلىسى جاڭاوزەن قالاسىندا 2011 جىلى ادام ولىمىنە اكەلگەن تولقۋلار بولدى. جالاقى مەن ەڭبەك جاعدايىنا بايلانىستى نارازىلىق شەرۋىن پوليسيانىڭ باسىپ-جانشۋى كەزىندە كەم دەگەندە 14 مۇنايشى قازا تاپتى" دەپ جازدى BBC.

شەتەلدىك باسىلىم ەكس-پرەزيدەنت نۇرسۇلتان نازاربايەۆ 2019 جىلى قىزمەتىنەن كەتكەنگە دەيىن حالىقتى ەش قيىندىقسىز باسقارعانىن جازدى. "ونىڭ مۇراگەرى بولعان پرەزيدەنت توقايەۆ 2019 جىلعى كەزەكتەن تىس سايلاۋدا حالىقارالىق باقىلاۋشىلاردىڭ سىنىنا ۇشىرادى. نازاربايەۆ پەن ونىڭ مۇراگەرى تۇسىندا شاعىن ەليتا وراسان زور بايلىققا قول جەتكىزدى. كوپتەگەن قاراپايىم قازاقستاندىقتاردىڭ ءومىرى ءالى دە قيىنشىلىقتا، ال، ەلدىڭ باتىسى تابيعي رەسۋرستارعا باي. ەلدە سيرەك بولاتىن نارازىلىقتار اياۋسىز باسىپ تاستالادى، ال رەجيمنىڭ پارلامەنتتە شىن وپپوزيسياسى جوق" دەلىنگەن The Guardian گازەتى تاراتقان اقپاراتتا.