ءماجىلىس دەپۋتاتى جاناربەك ءاشىمجانوۆ قاڭتار وقيعاسىنان كەيىن بولىپ جاتقان ازاپتاۋ فاكتىلەرىنە بايلانىستى پىكىر ءبىلدىردى.
– جىل باسىندا ومىرىمىزگە ەنگەن ساياسي "قاسىرەتتى قاڭتار" وقيعاسى تاۋەلسىزدىك جىلدارىنداعى اۋىر سىن ساعاتتىڭ ءبىرى بولدى. وعان رەسمي باعا بەرىلدى. مەملەكەتتىك توڭكەرىسكە جاسالعان قادام دەپ تانىلدى. دەمەك، بۇل – تاۋەلسىزدىكتىڭ تامىرىنا بالتا شابىلعان قادامدار. راديكالدىق ساياسي توپتار، ناقتىراق ايتقاندا، ءدىني توپتار قارا نيەت، ارام پيعىلدارىن جۇزەگە اسىرعىسى كەلگەن اۋىر زارداپتى كەزەڭ بولدى. ءتىپتى باقىلاۋدان شىققان ءساتتى دە باستان وتكەردىك، – دەدى ءماجىلىس دەپۋتاتى.
دەپۋتات قاڭتار وقيعاسى كەزىندە كۇش قۇرىلىمى سالاداعى قىزمەتكەرلەردىڭ ءوزى بەيتاراپ قالىپ، ەلدىڭ قاۋىپسىزدىگىنە جاۋاپتى قىزمەت ورگاندار حالىق الدىندا شاراسىز كۇيدە قالعانىن اتاپ ءوتتى.
– شايقالىپ جاتقان كونستيتۋسيالىق قۇرىلىمدى توقتاتۋعا، جويۋعا باعىتتالعان مەملەكەت باسشىسى قاسىم-جومارت توقايەۆتىڭ شەشىمى ارقاسىندا اۋىر سىناقتاردان وتتىك. بارلىق جاۋاپكەرشىلىكتى ەل پرەزيدەنتى ءوز موينىنا الدى. جالپى سول كۇندەردەگى احۋال، قوعامداعى جاعداي، اۋىر كوڭىل-كۇي، باقىلاۋدان شىققان ساتتەردىڭ ساياسي باعاسى ساراپتالىپ، قۇقىقتىق باعاسى بەرىلەر، ءبىراق حالىقتى قالقان ەتكەن ارام پيعىلدى توپتاردىڭ جاعدايىنا حالىق الاڭداۋلى. وسى رەتتە ءبىز اقپاراتتىق-ناسيحاتتىق جۇمىس جۇرگىزىپ، حالىققا كومەكتەسۋىمىز كەرەك. ايتا كەتەتىنىم، حالىق سول كەزەڭدەردەگى مەملەكەت باسشىسىنىڭ ەرلىك-جىگەرىن تۇسىنە ءبىلۋى قاجەت. كونستيتۋسيالىق قۇرىلىم تۇبەگەيلى جويىلسا، وسى كۇندەرى قانداي جاعدايدا بولىپ، نەنى باستان كەشەتىنىمىزدى ويلاپ كورىڭىز؟! – دەيدى جاناربەك ءاشىمجانوۆ.
سونداي-اق ول قاڭتار وقيعاسىنان كەيىن ۇستالعانداردى ازاپتاۋ فاكتىلەرى كوپ تىركەلىپ جاتقان تالدىقورعان قالاسىنا ىس-ساپارمەن بارعالى وتىرعانىن جەتكىزدى.
– ورىنسىز، ناقاق جالا جابىلىپ جاتقان، تاياققا تۇسكەن بىرنەشە ىسكە قاتىستى پرەزيدەنت ناقتى تاپسىرما بەردى. ءسويتىپ بىرنەشە ازامات بوساتىلدى. ال ەندى سوققىعا جىعىلىپ جاتقان اۋىر ازاپتاۋلار قوعامنىڭ دا، ەلدىڭ دە، جەكە ازامات رەتىندە مەنىڭ دە جانىما باتادى. ەرتەڭ تالدىقورعانعا وسى وقيعاعا بايلانىستى ءىس-ساپارعا بارىپ، تۇرعىندارمەن كەزدەسەمىن. ەلىمىزدە قىلمىس جاساعانى دا، قىلمىسقا قاتىستىلىعى دا زاڭ شەڭبەرىندە قارالۋى كەرەك. ال قىزمەتىن اسىرا پايدالانعان ءتيىستى ۆەدومستۆو وكىلدەرىنە زاڭ جۇزىندە باعاسى بەرىلۋى ءتيىس. پروكۋراتۋرا وسىنداي ماسەلەگە بايلانىستى بىرنەشە قىلمىستىق ءىس قوزعالعانى تۋرالى مالىمەت بەرگەن بولاتىن، – دەدى دەپۋتات.
پىكىر قالدىرۋ