رەسەيدەگى ماسكەۋ قالالىق دۋماسىنىڭ دەپۋتاتى سەرگەي ساۆوستيانوۆ ليتۆا، لاتۆيا، ەستونيا، پولشا، مولدوۆا جانە قازاقستانعا ۋكرايناداعىداي دەناسيفيسيكاسيا مەن دەميليتاريزيسيا جۇرگىزۋ كەرەكتىگىن، باسقاشا ايتقاندا باسىپ كىرۋ كەرەكتىگىن ءمالىم ەتتى. وسىلاي دەلىنگەن قۇجاتتى رەسەيلىك "يابلوكو" پارتياسى ماسكەۋ فيليالى باسشىسىنىڭ ورىنباسارى كيريلل گونچاروۆ facebook پاراقشاسىنا جاريالادى.

"ۋكرايناداعى دەميليتاريزاسيا مەن دەناسيفيكاسيا ۋكراينا، رەسەي مەن ەۋروپا حالقىنىڭ تۇراقتى قاۋىپسىزدىگىن قامتاماسىز ەتەدى. رەسەي تولىق قاۋىپسىزدىكتى قامتاماسىز ەتۋى ءۇشىن ۋكراينادان بولەك دەناسيفيكاسيي مەن دەميليتاريزاسياعا پريبالتيكانى (ليتۆا، لاتۆيا، ەستونيا – رەد.)، پولشانى، مولدوۆا مەن قازاقستاندى قوسقان دۇرىس بولادى دەپ سانايمىن" دەيدى سەرگەي ساۆوستيانوۆ رەسمي قۇجاتتا.

رەسەي 24 اقپاندا ۋكرايناعا باسىپ كىرگەندە، ۋكراينادا "دەميليتاريزاسيا" (قارۋسىزداندىرۋ) مەن "دەناسيفيكاسيا" (ناسيستىك يدەولوگيادان تازارتۋ) جۇرگىزۋدى ماقسات ەتىپ وتىرعانىن ءمالىم ەتكەن.

بۇعان دەيىن دە رەسەي شەنەۋنىكتەرىنىڭ تاراپىنان قازاقستانعا قاراتا ارانداتۋشىلىق سوزدەر، ەلدىڭ اۋماقتىق تۇتاستىعىنا نۇقسان كەلەتىن مالىمدەمەلەر ايتىلعان. قازاقستان بيلىگىنىڭ وكىلدەرى ونداي مالىمدەمەلەر كرەملدىڭ رەسمي ۇستانىمىن بىلدىرمەيدى، تەك جەكەلەگەن ادامداردىڭ ءسوزى دەگەندى الدەنەشە رەت قايتالاعان. ال جاقىندا ءماجىلىس دەپۋتاتى ايدوس سارىم رەسەيدىڭ ۋكرايناعا باسقىنشىلىعى تۋرالى اشىق ايتقىسى كەلمەيتىنىن، ونىڭ كوزقاراسى قازاقستاننىڭ رەسمي ۇستانىمىن بىودىرگەندەي بولىپ قالاتىنىن جەتكىزگەن.