سىبايلاس جەمقورلىققا قارسى قىزمەت قايرات ساتىبالدى ۇلى مەن گۇلميرا ساتىبالدى جانە باسقا دا تۇلعالارعا قاتىستى تەرگەۋ بارىسىندا انىقتالعان كەيبىر اقپاراتتاردى جاريالادى.
"تەرگەۋ بارىسىندا ق.ساتىبالدى ۇلىنىڭ باقىلاۋىنداعى كاسىپورىنداردىڭ – كىرمە تەمىرجول جەلىلەرى (سوڭعى شاقىرىم) يەلەرىنىڭ ۇرلىعىنىڭ قوسىمشا فاكتىلەرى انىقتالدى. اتالعان تۇلعالار مەملەكەتتىك ورگانداردىڭ لاۋازىمدى تۇلعالارىنىڭ كومەگىمەن ەلدىڭ قالا قۇراۋشى كاسىپورىندارىنا كىرمە جولداردىڭ قىزمەتتەرىنە ءتاريفتى نەگىزسىز كوتەرۋ ارقىلى كوپ ميللياردتىق پايدا تاپقان. بۇل ءوز كەزەگىندە ازاماتتار ءۇشىن تىرشىلىكتى قامتاماسىز ەتۋ قىزمەتتەرىنىڭ باعالارىنىڭ ارتۋىنا باعىتتالعان. ق. ساتىبالدى ۇلى باقىلاۋىنداعى ەكى كومپانيانىڭ باسشىلارى ۇستالىپ، سوت سانكسياسىمەن قاماۋعا الىندى. كىنالىلىك تۋرالى قورىتىندى شەشىمدى سوت انىقتايدى" دەلىنگەن انتيكور حابارلاماسىندا.
قايرات ساتىبالدى ۇلى 13 ناۋرىز كۇنى قاماۋعا الىنعان. ول ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى. ەلدەگى باي ادامداردىڭ ءبىرى. كەزىندە ۇلتتىق قاۋىپسىزدىك كوميتەتىندە، "Kazakh Oil"، "قازاقستان تەمىر جولى" ۇلتتىق كومپانيالارىندا ىستەگەن. "Kaspi.kz" اكسيونەرلىك قوعامىنىڭ نەگىزگى اكسيونەرى بولعان. ءدىني ورتالاردا ىقپالدى ادام سانالادى. ول يسلام ءدىنىنىڭ ءسالافيزم اعىمىنىڭ بەلدى وكىلى دەگەن بەيرەسمي اقپارات بار.
قايرات ساتىبالدى ۇلىنىڭ بۇرىنعى ايەلى 17 ناۋرىزدا قاماۋعا الىنعان گۇلميرا ساتىبالدىنىڭ كاسىپكەر، بەلگىلى پروديۋسەر بايان ماقسات قىزىنىڭ كۇيەۋى تۇرسىن الاگوزوۆتىڭ كومپانياسىن رەيدەرلىك جولمەن تارتىپ الۋعا قاتىسى بار ەكەنى تۋرالى حابارلانعان.
پىكىر قالدىرۋ