ءۇندىستاننىڭ چەنناي قالاسىندا وتكەن شاحمات وليمپياداسىنا قازاقستان قۇراماسى تۋسىز بارعان. بۇل تۋرالى شاحماتشى ءبيبىسارا اساۋبايەۆانىڭ اناسى ليانا تاڭجارىقوۆا ءوزىنىڭ Facebook پاراقشاسىنا جازدى. 

"شاحماتتىڭ وتانى ءۇندىستاندا بيىل العاش رەت 186 ۇلتتىق قۇرامانىڭ شەرۋىمەن وليمپيادانىڭ اشىلۋ سالتاناتى ءوتتى. اشىلۋ سالتاناتى اۋقىمدى تۇردە ءوتتى. ءۇندىستان  جۇرتتى تاڭ قالدىرۋ ءۇشىن بارىن سالدى. ءبىراق وليمپيادادا 185 مەملەكەتتىڭ جالاۋى بولدى. نەلىكتەن 186 كوماندا بولا تۇرا، 185 تۋ دەپ سۇرايتىن شىعارسىزدار؟ ويتكەنى، قازاقستان شاحمات فەدەراسياسى الەمدىك وليمپياداعا كوك تۋدى كەرەك ەتپەگەن. نەمەسە الدىن الا دايىندالماعان، 20 مىڭ تەڭگەگە ساتىپ العىسى كەلمەگەن، كوك تۋدى الۋدى ۇمىتىپ كەتكەن. سەبەبى ماڭىزدى ەمەس. ناتيجەسىندە حالىقارالىق وليمپيادانىڭ اشىلۋ سالتاناتىنا قازاقستان كوك تۋسىز قاتىستى. بۇل وتە ۇيات ءارى ماسقارا. بارلىعىن كەشىرۋگە بولادى، ءبىراق  تۋدى ەستەن شىعارعاندارىن كەشىرۋ مۇمكىن ەمەس!" دەپ جازدى ليانا تاڭجارىقوۆا.

بۇل جاعدايعا قاتىستى قازاقستان شاحمات فەدەراسياسى ءالى تۇسىنىكتەمە بەرگەن جوق.