الماتىدا دوسىنىڭ كامەلەتكە تولماعان قىزىن زورلاماق بولعان ەر ادام 15 جىلعا سوتتالدى، – دەپ حابارلادى ىشكى ىستەر مينيسترلىگىنىڭ رەسمي ينتەرنەت رەسۋرسى.

"تەرگەۋ بارىسىندا انىقتالعانداي، م.ەسىمدى ازامات تۋىستارىمەن جانجالداسىپ، دوسىنىڭ ۇيىنە تۇنەۋگە كەلگەن. بارلىعى ۇيىقتاپ كەتكەن سوڭ قوناق بولمەدە دوسىنىڭ 11 جاستاعى قىزىن كورىپ، ونى زورلاماق بولعان. بالا ساسقالاقتاپ قالمادى، ايعايلاي باستادى. ونىڭ كومەك سۇراعانىنا اكەسى مەن اعاسى جاۋاپ بەردى. ولار پوليسيا شاقىردى، بۇل كۇدىكتىنى قىلمىس ورنىندا جەدەل ۇستاۋعا مۇمكىندىك بەردى. كەيىن ول قاماۋعا الىنىپ، ۋاقىتشا ۇستاۋ يزولياتورىنا اۋىستىرىلدى" دەلىنگەن حابارلامادا.

كۇدىكتىگە قىلمىستىق كودەكستىڭ 24-بابى 3-بولىگى، ق ر قك-نىڭ 120-بابى 4-بولىگى (زورلاۋعا وقتالۋ) بويىنشا قىلمىس جاسادى دەگەن ايىپ تاعىلىپ، الاتاۋ اۋداندىق سوتى كۇدىكتىنى 15 جىلعا باس بوستاندىعىنان ايىرۋ جازاسىن كەستى. قىلمىسكەر جازاسىن قاتاڭ رەجيمدەگى تۇزەۋ كولونياسىندا وتەيدى.