سولتۇستىك قازاقستان وبلىسىندا رەسەيلىكتەردىڭ اعىلۋىنا بايلانىستى جالدامالى پاتەرلەردى تەكسەرۋ شارالارى باستالدى، دەپ حابارلادى AstanaTV ارناسى.
رەسمي مالىمەتكە سايكەس، 21 قىركۇيەكتەن بەرى سولتۇستىك قازاقستان وبلىسىندا رەسەيدەن كەلگەن 30 مىڭنان استام ادام تىركەلگەن. قازىرگى كەزدە كەلۋشىلەردىڭ سانى ازايعان. سەبەبى رەسەي جاقتان اسكەري مىندەتى بار ازاماتتاردى باقىلاۋ شارالارى كۇشەيگەن.
دەگەنمەن، سولتۇستىك وڭىرگە كەلگەن رەسەيلىكتەر از ەمەس. بىرەۋلەر ترانزيتپەن باسقا ەلگە ۇشىپ كەتۋدى كوزدەسە، ەندى بىرەۋلەر جۇمىس ىزدەۋگە كىرىستى. ءبىراق باسپانا ماسەلەسى قيىن بولىپ تۇر، كوبىسى ۆوكزالدا تۇنەۋگە ءماجبۇر.
ال سولتۇستىك قازاقستان وبلىستىق پوليسيا دەپاراتمەنتىنىڭ كوشى-قون باسقارماسى تەكسەرىس شارالارى باستالعانىن جاريالادى.
"قازىرگى كەزدە ۋچاسكەلىك ينسپەكتورلار، كوشى-قون قىزمەتى، پروكۋراتۋرا مەن اكىمدىك قىزمەتكەرلەرى كىرەتىن ءموبيلدى توپتار قۇرىلدى. ولار كاسىپورىنداردى، ۇيىمداردى، حوستەلدەردى، قوناق ۇيلەردى، سونداي-اق، ادام كوپ تۇراتىن پاتەرلەردى تەكسەرەدى" دەيدى باسقارما باستىعىنىڭ ورىنباسارى ەرمەك نۇسىربايەۆ.
ايتا كەتەرى، كورشى ەلدە ءىشىنارا موبيليزاسيا جاريالانعان ساتتەن باستاپ قازاقستانعا 98 مىڭعا جۋىق رەسەيلىك كىرگەن. ال شىعىپ كەتكەن رەسەيلىكتەردىڭ سانى 64 234 ادامدى قۇراپ وتىر.
پىكىر قالدىرۋ