13 قازاندا اتىراۋ وبلىسى اكىمىنىڭ ەكس-ورىنباسارى باقىتگۇل حامەنوۆاعا قاتىستى كەزەكتى سوت وتىرىسىندا ايىپتالۋشىلاردىڭ ءبىرى اقىلبەك رىسقالييەۆ كۇتپەگەن مالىمدەمە جاسادى. ول ءوزىنىڭ باستاپقىدا "پارا بەرۋشى مەن پارا الۋشى اراسىندا دەلدال بولدىم" دەگەن جاۋابىن وزگەرتىپ، حامەنوۆا 4،5 ملن تەڭگەگە ەشقانداي قاتىسى جوق ەكەنىن ايتتى، دەپ جازادى اق جايىق باسىلىمى. 

ول باستاپقىدا بەرگەن كۋالىگى انتيكور قىزمەتكەرلەرىنىڭ ىقپالىمەن بولعانىن جەتكىزدى. 

– مەن وسىعان دەيىن كوپ ويلاندىم. وسىعان دەيىنگى ارەكەتتەردى كورىپ وتىرىپ، قاتتى شارشادىم. باسىندا، ءبىرىنشى بەرگەن جاۋاپتارىممەن قالامىن دەپ تىرىسقام. مەنى سول ينسترۋكتاجدان وتكىزگەن انتيكور قىزمەتكەرلەرى "وسىلاي سوڭىنا دەيىن بارساڭ، ءوزىڭ ءۇشىن ءبارى جاقسى بولادى، قورعالۋ قۇقىعىنا يە بولاسىڭ، جاۋاپكەرشىلىككە تارتىلمايسىڭ، بارىنەن دە بوساتىلاسىڭ" دەگەن بولاتىن. ءبىراق كۇنى بۇگىنگە دەيىن ولاردىڭ تاراپىنان مەنى قورعاۋ، قولداۋ تۋرالى ارەكەتتەر جاسالماعاندىقتان، راسىندا مەن قانداي ماقساتتا قارجى سۇراۋعا ءماجبۇر بولدىم، ەل ءۇشىن جاسالعان جۇمىستاردىڭ جىرتىعىن جاماۋعا دەمەۋشى كەرەك بولعانىن شىنىمەن دە ءبارى قالاي بولعانىن ايتۋعا شەشىم قابىلدادىم،– دەدى رىسقالييەۆ. 

رىسقالييەۆتىڭ بۇل مالىمدەمەسىنەن كەيىن سوتقا قاتىسۋعا كەلگەندەردىڭ ءبارى قول شاپالاقتاپ، حامەنوۆا كوزىنە جاس الدى.  

– مۇسىلماندىق تانىتقانىڭىزعا، انتيكوردان ەمەس، اللادان قورىققانىڭىزعا، 10 اي بويى تار قاپاستا قامالىپ وتىرسام دا بۇگىن شىندىقتى ايتقانىڭىزعا مەن راحمەت ايتامىن، – دەدى حامەنوۆا.

حامەنوۆانىڭ ءىسى بويىنشا كەلەسى سوت وتىرىسى 21 قازانعا بەلگىلەندى.