الماتى وبلىسىنىڭ اكىمدىگى مەن "وتباسى بانك" جاستارعا ارنالعان جاڭا تۇرعىن ءۇي باعدارلاماسىن ىسكە قوساتىنىن حابارلادى. جوبا 35 جاسقا دەيىنگى وبلىس تۇرعىندارىنا جەكە باسپانا ساتىپ الۋ ءۇشىن جەڭىلدەتىلگەن نەسيە الۋعا مۇمكىندىك بەرەدى.

«الاتاۋ جاستارى» باعدارلاماسىنىڭ بويىنشا:

♦ قاتىسۋشىلاردىڭ الماتى وبلىسىنداعى رەسمي جۇمىس ءوتىلى ءبىر جىلدان كەم بولماۋى ءتيىس. ونى مىندەتتى تۇردە زەينەتاقى جارنالارىنىڭ تۇراقتى ءتۇسىمى كورسەتىلگەن قۇجاتپەن راستاۋ قاجەت.

♦ ءوتىنىش بەرۋشىنىڭ الماتى وبلىسىندا كەمىندە ءبىر جىلدىق مەرزىمى بار تۇراقتى تىركەۋى بولۋى كەرەك.

♦  باعدارلاماعا قاتىسۋشىنىڭ جانە ونىڭ وتباسى مۇشەلەرىنىڭ سوڭعى 5 جىلدا اتتارىنا تىركەلگەن جىلجىمايتىن مۇلىكتەرى بولماۋى ءتيىس.

باعدارلاماعا قاتىسۋشى جاڭا تۇرعىن ءۇي (پايدالانۋعا بەرىلگەن بولۋى ءتيىس) ساتىپ السا، وندا العاشقى جارنا 0% بولادى. ەگەر ەكىنشى نارىقتان الىنعان تۇرعىن ءۇي بولسا (پاتەر نەمەسە جەكە ءۇي)، وندا العاشقى جارنا 10% قۇرايتىن بولادى. نەسيە بويىنشا سىياقى مولشەرلەمەسى جىلدىق 5%-عا تەڭ (جتسم 5،2%). نەسيەنىڭ ماكسيمالدى مەرزىمى – 19 جىل.

وتباسى بانكتىڭ الماتى وبلىستىق فيليالىنىڭ ديرەكتورى عالىمجان شالعىمبايەۆ الماتى وبلىسى وسىنداي باعدارلامالاردى بۇرىن ىسكە اسىرعان الماتى، استانا قالالارى، قاراعاندى، جامبىل جانە قوستاناي وبلىستارىنىڭ وڭتايلى تاجىريبەسىن ۇلگى رەتىندە الىپ وتىرعانىن ايتادى.

"بۇل قالالارداعى جەرگىلىكتى بيلىك وتباسى بانكىمەن بىرلەسە وتىرىپ، جاستاردى قولداۋ ماقساتىندا تۇرعىن ءۇي باعدارلامالارىن ىسكە قوسقان. ءبىرىنشى كەزەڭدە وبلىس اكىمدىگى جاڭا جوباعا 600 ملن تەڭگە ءبولىپ وتىر. ال وتباسى بانك ءوز كەزەگىندە بۇل قاراجاتقا جەڭىلدەتىلگەن نەسيە بەرۋگە كومەكتەسەدى. وسىنداي قولداۋدىڭ ارقاسىندا وبلىس تۇرعىندارى بيىلدىڭ وزىندە العاشقى قونىس تويىن تويلايتىن بولادى" دەدى عالىمجان شالعىمبايەۆ.

جاڭا تۇرعىن ءۇي باعدارلاماسىنا قاتىسۋ تۋرالى وتىنىشتەر 2022 جىلدىڭ 1 قاراشاسىنان باستاپ، ءبىر اي بويى قابىلدانادى. ۇمىتكەرلەر وبلىس اكىمدىگىنىڭ ىشكى ساياسات باسقارماسىنا ءوتىنىش بەرۋلەرى قاجەت.

وتىنىشتەردى قابىلداۋ اياقتالعاننان كەيىن اكىمدىكتەن ارنايى قۇرىلعان كوميسسيا جينالعان ۇپايلار بويىنشا باعدارلاماعا قاتىسۋشىلاردى ىرىكتەيدى. ولارعا نەكەدە بولعان جىلدار سانى، بالالارىنىڭ بولۋى، جۇمىس تاجىريبەسى، ماماندىعى جانە قىزمەت سالاسى اسەر ەتەدى.

وتىنىشتەردى قابىلداۋ اياقتالعاننان كەيىن قاتىسۋشىلاردىڭ ءتىزىمى جاسالىپ، وتباسى بانكىنە جىبەرىلەدى. قاتىسۋشىلار بانكتە تولەم قابىلەتىن باعالاتىپ، باسپانا تابۋى كەرەك. ونى ساتىپ الۋعا بانك 10 ملن تەڭگە نەسيە بەرەدى. ەگەر مۇلىكتىڭ قۇنى 10 ملن تەڭگەدەن اساتىن بولسا، ۇمىتكەر ايىرماشىلىقتى ءوز قاراجاتى ەسەبىنەن تولەي الادى.