– ءبىز ارقانى كەڭگە سالماي، بارلىق سالادا تەمىردەي ءتارتىپتى ساقتاۋىمىز كەرەك. ەلگە قاتەر تونسە، كەز-كەلگەن ساتتە تويتارىس بەرۋگە دايىن بولۋىمىز قاجەت. تۋعان جەردىڭ شەبىن كۇزەتىپ، تۇتاستىقتى ساقتاۋ – ءار ازاماتتىڭ مىندەتى. مۇنى جەتە تۇسىنۋگە ءتيىسپىز. ەلىمىزدىڭ قاۋىپسىزدىگىن قامتاماسىز ەتۋ – قاسيەتتى بورىش، جوعارى جاۋاپكەرشىلىك. سىزدەر وسى جاۋاپكەرشىلىكتى تەرەڭ سەزىنىپ، ەلدىگىمىزدىڭ تۇعىرىن نىعايتۋعا زور ۇلەس قوسىپ جۇرسىزدەر. وتانىمىزدى قورعاۋ ءۇشىن كۇندىز-تۇنى قىزمەت ەتىپ كەلەسىزدەر. جاس ساربازدار، ەڭ الدىمەن، سىزدەرگە قاراپ بوي تۇزەيدى، ۇلگى-ونەگە تۇتادى. سوندىقتان، گەنەرال دەگەن ايبىندى اتقا داق تۇسىرمەي، وفيسەردىڭ ار-نامىسىن بيىك ۇستاۋ اسا ماڭىزدى، – دەدى پرەزيدەنت.
قاسىم-جومارت توقايەۆ ەل تاۋەلسىزدىگىن، بەيبىتشىلىك پەن كەلىسىمدى ساقتاۋ ءۇشىن ەلدىڭ قورعانىس الەۋەتىن دايەكتى تۇردە نىعايتىپ، بۇكىل كۇشتىك قۇرىلىمداردىڭ قىزمەتىن جەتىلدىر باعىتىندا جۇمىس جالعاساتىنىن ايتتى.
– ۇلتتىق مۇددەمىز بەن قوعامداعى تۇراقتىلىقتى قورعايتىن بارلىق ازاماتتى الەۋمەتتىك تۇرعىدا كەشەندى قولداۋ قاشان دا مەملەكەتتىك ساياساتتىڭ باسىم باعىتى بولىپ قالا بەرەدى. كۇشتىك قۇرىلىمداردىڭ تيىمدىلىگى، ەڭ الدىمەن، باسشىلىقتىڭ، ياعني، گەنەرالداردىڭ كاسىبيلىگىنە نەگىزدەلگەن. ادامداردىڭ ءومىرى مەن تاعدىرى، قوعامدىق ءتارتىپ، ەلدىڭ يگىلىگى مەن تۇراقتى دامۋى سىزدەردىڭ كاسىبي شەبەرلىكتەرىڭىزگە بايلانىستى، – دەدى ول.
پىكىر قالدىرۋ