قارجىلىق مونيتورينگ اگەنتتىگىنىڭ مالىمەتىنشە، ميحايل كوزاچكوۆ بولات نازاربايەۆتىڭ وڭ قولى دەلىنىپ جۇرگەن ايدوس كوسپايەۆ دەگەن ازاماتتىڭ ۇيىمداسقان قىلمىستىق توبىنا رەيدەرلىك باسىپ الۋلار جاساۋعا كومەكتەستى دەگەن كۇدىككە ىلىنگەن.
قما ءجۋرناليستى قوعامدىق پىكىر قالىپتاستىرۋ ارقىلى قىلمىسكەرلەرگە بولىستى، اقپاراتتىق شابۋىل ۇيىمداستىردى، جالعان مالىمەت تاراتتى، ادام بەدەلىنە نۇقسان كەلتىرەتىن ماقالالار جاريالادى، مەملەكەتتىك قۇپياعا جاتاتىن اقپاراتتاردى جيناپ، تاراتتى دەپ ايىپتاپ وتىر. ورگان دەرەگىنشە، جۋرناليست وسى قىزمەتى ءۇشىن قوماقتى سىياقى العان.
ءجۋرناليستىڭ ادۆوكاتى اننا ۆەرەتەلنيكوۆا كۇدىكتىنىڭ ءۇيىن ءتىنتۋ كەزىندە پروسەدۋرالىق نورمالار ساقتالمادى، ءتىنتۋ ادۆوكات قاتىسۋىنسىز بولىپ جاتىر دەپ مالىمدەگەن. "ءادىل ءسوز" باسپا ءسوز قورعاۋ ۇيىمى بۇعان الاڭداۋشىلىق ءبىلدىرىپ، قارجى مونيتورينگى اگەنتتىگى تاراتقان اقپاراتتىق حابارلاما كىناسىزدىك پرەزۋمپسياسىن ساقتاماعانىن، كونستيتۋسيانىڭ 77-بابىنا ساي، "ادامنىڭ كىنالىلىگى سوتتىڭ زاڭدى كۇشىنە ەنگەن ۇكىمىمەن تانىلاتىنىن" اتاپ ءوتتى.
مۇنداي پىكىردى قۇقىققورعاۋشى ءلاززات احاتوۆا دا ءبىلدىردى.
"كىنالى بولسىن، كۇنالى بولسىن، قىلمىسكەر بولسىن، رەسيديۆيست بولسىن، قىلمىستىق ىسكە قاتىستى بارلىق شارا - قىلمىستىق زاڭناما نورمالارىنان اۋىتقىماي، زاڭ شەڭبەرىندە جاسالۋى كەرەك. قۇقىقتىق، زايىرلى مەملەكەتىمىز قايدا قالدى؟ ەلدەگى جاعدايلاردى پرەزيدەنت بىلە مە؟ ءبىزدى جالپى كىم باسقارىپ وتىر دەگەن كۇدىك بار، كوڭىلدە. سوڭعى كەزدە. ويتكەنى ەلدە بولىپ جاتقان وقيعالار باسسىز، باسشىسىز، انارحيادا جۇرگەندەي اسەر ەتىپ جاتىر" دەدى ادۆوكات facebook پاراقشاسىندا.
قوعام بەلسەندىلەرى مەن زاڭگەرلەر الەۋمەتتىك جەلى شۋلاعان سوڭ ۇزاماي پرەزيدەنتتىڭ باسپا ءسوز حاتشىسى رۋسلان جەلدىباي جۋرناليسكە قاتىستى ءىس بارىسىندا تىركەلگەن قۇقىقبۇزۋشىلىقتار تۋرالى حابارعا رەاكسيا تانىتتى.
"بۇل ءىس قازاقستان رەسپۋبليكاسىنىڭ زاڭناماسىنا سايكەس تەك قۇقىق شەڭبەرىندە قارالۋعا ءتيىس ەكەنىن اتاپ ءوتۋ قاجەت. باس پروكۋراتۋرا تەرگەۋدىڭ زاڭدىلىعىن قاداعالاۋدى قامتاماسىز ەتۋگە جانە زاڭنامادا بەلگىلەنگەن تارتىپپەن قاجەتتى تۇسىنىكتەمەلەر بەرۋگە مىندەتتى. قازاقستان ازاماتى رەتىندە ءجۋرناليستىڭ بارلىق زاڭدى قۇقىعى تولىق ساقتالۋعا ءتيىس" دەدى رۋسلان جەلدىباي.
ءبىرقاتار بەلسەندى ازاماتتار مەن كوزاچكوۆتىڭ ارىپتەستەرى بولىپ جاتقان وقيعانى قۇقىقتىق سالا، سوت جۇيەسى تۋرالى وتكىر جازاتىن ءجۋرناليستىڭ اۋزىنا قاقپاق بولۋ ارەكەتى دەپ سانايتىنىن جەتكىزىپ، "مۇندايدى جاڭا قازاقستانعا جاراسپايتىن تىرلىك" دەگەنگە ساياتىن پىكىر ايتىپ جاتىر.
كوزاچكوۆ بۇعان دەيىن ءوزىن ۇقك قىزمەتكەرلەرى اڭدىپ جۇرگەنىن، الدەكىمدەر كولىگىن سىرىپ كەتكەنىن حابارلاعان.
ءجۋرناليستىڭ ۇستالۋى كوپشىلىك كوكەيىندە اقپارات سالاسىندا سوت جۇيەسىندەگى زاڭسىزدىقپەن باتىل كۇرەسىپ جۇرگەندەي كورىنەتىن ميحايل كوزاچكوۆتىڭ ءوزى قىلمىسقا قاتىسى بار بولىپ شىقتى ما، الدە قما "جاڭا قازاقستانعا" جاراسپايتىن تىرلىك ىستەپ وتىر ما دەگەندەي ەكىۇداي وي تۋدىردى.
پىكىر قالدىرۋ