الماتىداعى رەسپۋبليكا الاڭىندا قاڭتار وقيعاسىنىڭ قۇرباندارىنا ارنالعان "تاعزىم" مەموريالى اشىلدى. كەشەننىڭ اشىلۋ راسىمىنە پرەزيدەنت ق.توقايەۆ قاتىستى.
پرەزيدەنت جينالعاندار الدىندا سويلەگەن سوزىندە قاڭتار وقيعاسى تۋرالى ءبىراز وي قوزعادى. ءبىراق حالىقتىڭ بەيبىت نارازىلىعى بۇلىككە اينالىپ كەتكەنىنىڭ ارتىندا كىم تۇرعانىن بۇل جولى دا اشىپ ايتپادى. قاڭتار وقيعاسى "ەشقاشان قايتالانباۋى ءۇشىن ءبىز قولدان كەلگەننىڭ ءبارىن جاساپ وتىرمىز" دەگەن سوزىندەگى "ءبىز" دەگەنى بيلىكتى مەڭزەگەنى مە، باسقا ما، ول جاعى دا تۇسىنىكسىز.
پرەزيدەنتتىڭ جۇمىسشىلاردى، فەرمەرلەر، دارىگەرلەر مەن مەدبيكەلەر، مۇعالىمدەر مەن وقىتۋشىلار، عالىمدار مەن مادەنيەت قايراتكەرلەرى، كاسىپكەرلەر مەن سپورتشىلاردى باتىر دەپ اتاپ، بۇزاقىلاردى، راديكالدار مەن لاڭكەستەردى باتىر ەتىپ كورسەتۋدىڭ قاجەتى جوق دەگەنى ءبىر قاراعاندا دۇرىس. الايدا قازاقستاندا ساياسي بەلسەندىلىك ءۇشىن ازاماتتار راديكال، لاڭكەس اتانىپ كەتۋ ىقتيمالدىعى جوعارى ەكەنىن ەسكەرسەك، پرەزيدەنتتىڭ بۇل ءسوزى ازاماتتىق قوعامعا قاراتا ايتىلعان بولۋى دا عاجاپ ەمەس.
توقايەۆ "قاڭتار وقيعاسى ءبارىمىز ءۇشىن ۇلكەن ساباق بولدى" دەگەن سوزىندە دە كوپشە ءتۇردى قولداندى. "بيلىك ءۇشىن ۇلكەن ساباق بولدى" ەمەس، "ءبارىمىز ءۇشىن" دەپ، ءسوزىن تىنىشتىق پەن تۇراقتىلىقتى باستى بايلىق ەكەنىن ايتۋمەن ساباقتادى.
"ءبىز قۇت-بەرەكەنىڭ باستاۋى تۇراقتىلىق ەكەنىن ۇعىندىق. ەل تىنىشتىعىن ساقتاي بىلمەسەك، دۇنيە ءبىر ساتتە استاڭ-كەستەڭ بولاتىنىن كوردىك. تاۋەلسىزدىگىمىز بەن مەملەكەتتىگىمىزدى كۇن سايىن قورعاۋىمىز قاجەت ەكەنىن سەزىندىك. «جاۋ جوق دەمە، جار استىندا» دەگەن ءسوزدىڭ ءمانىن دە جەتە تۇسىندىك. ىنتىماق پەن بىرلىك بولماسا، باسقا جەتىستىكتىڭ ءبارى بەكەر ەكەنىنە كوز جەتكىزدىك" دەگەن سوزدەرى "ەسكى قازاقستان" ءجيى قولدانعان شۇكىر ەتۋگە شاقىرۋ ارقىلى قوعامدى ساياسي وقيعالارعا بەلسەنە قاتىستىرماۋعا تىرىسۋ ريتوريكاسىنا ۇقسايدى.
پىكىر قالدىرۋ