قىتايدا كوروناۆيرۋستىڭ تارالۋىنا بايلانىستى جاعداي ناشارلاپ بارادى، دەپ جازادى BBC. سونداي-اق جۇڭگو بيلىگى ۆيرۋس جۇقتىرىپ قايتىس بولعاندارعا قاتىستى ساناق جۇرگىزۋدىڭ جاڭا ءادىسىن ەنگىزگەن. دۇنيەجۇزىلىك دەنساۋلىق ساقتاۋ ۇيىمى جاڭا ءادىستى قاتە دەپ سانايدى.

ددسۇ-نىڭ مالىمەتىنشە، قىتايداعى اۋرۋحانالار وميكروننىڭ جاڭا ءتۇرىن جۇقتىرعاندارعا تولى جانە ورىن جەتىسپەۋشىلىگى دە بايقالادى. جۇڭگو بيلىگى وسى اپتادا كوروناۆيرۋستان 7 ادام قايتىس بولعانىن حابارلادى. 

قىتايدا ۆيدۋستان قايتىس بولعانداردى ساناۋدىڭ ءوز شارتتارى بار. بيلىك ىلەسپەلى اۋرۋلاردان نەمەسە ۆيرۋستىڭ باسقا جاناما اسەرلەرىنەن ەمەس، تەك COVID-19 تۋدىرعان رەسپيراتورلىق اۋرۋدىڭ سەبەبىنەن قايتىس بولعانداردى عانا ەسەپكە الماق. 

"ساناقتىڭ بۇل ءادىسى ددسۇ ۇسىنىمدارىنا سايكەس كەلمەيدى. ناتيجەسىندە COVID-19-دان بولاتىن ءولىم دەڭگەيى تومەن كورسەتىلەتىن بولادى"، - دەيدى ددسۇ. 

بەيجىڭدەگى BBC اگەنتتىگىنىڭ دەرەگىنشە، قىتايداعى اۋرۋحانالاردا ۇزىن-سونار كەزەك جانە دارى-دارمەككە سۇرانىس وتە جوعارى. ال قىتايدىڭ CCTV ۇلتتىق تەلەارناسى بەيجىڭدەگى چاويان اۋرۋحاناسى ءوز رەسۋرستارىن ۇلعايتۋعا نيەتتى ەكەنىن، ويتكەنى كەلگەن ناۋقاستاردىڭ سانى 4 ەسەگە وسكەنىن حابارلادى.

وسى اپتادا شانحاي ءۇشىن قوسىمشا 230 مىڭ اۋرۋحانا توسەگى بولىنگەن. بۇدان بولەك، 16-20 جەلتوقسان ارالىعىندا قالادا وتكەن جىلدىڭ سايكەس كەزەڭىمەن سالىستىرعاندا جەدەل جاردەم شاقىرۋلارىنىڭ سانى ەكى ەسەدەن اسقان. 

Reuters سايتىنىڭ حابارلاۋىنشا، شانحايداعى اۋرۋحانا باسشىلىعى قىزمەتكەرلەرىنە COVID-19-عا قارسى "قاسىرەتكە تولى شايقاسقا دايىندالىڭدار" دەپ بۇيرىق بەرگەن. ويتكەنى، قالاداعى 25 ملن تۇرعىننىڭ جارتىسى كۆي جۇقتىرادى دەپ كۇتىلۋدە. سەبەبى ۆيرۋس قالا اراسىندا ەشقانداي جۇيەسىز تارالىپ جاتىر. 

بريتاندىق Airfinity زەرتتەۋ كومپانياسى قىتايدا كۇن سايىن 5 مىڭنان استام ادام كوروناۆيرۋستان قايتىس بولۋى مۇمكىن ەكەنىن مالىمدەگەن بولاتىن. ال ۇلتتىق جۇقپالى اۋرۋلار ورتالىعىنىڭ ديرەكتورى چجان ۆەنحۋن قىتايدا ءبىر اپتا ىشىندە COVID-19 جۇقتىرعاندار سانى ارتىپ، انتيرەكورد ورنايدى دەگەن بولجام ايتتى. 

تانىمال عالىم ءارى مەديك الماز شارمان قازاقستاندىقتاردى قىتايداعى دۇربەلەڭنەن قورىقپاۋعا شاقىردى، دەپ جازادى informburo.kz. 

"جۇڭگو "نولدىك توزىمسىزدىك" ساياساتىنان كەيىن كارانتين شەكتەۋلەرىن بىردەن الىپ تاستادى. سول سەبەپتى قىتايلاردىڭ كوبىندە ۇجىمدىق يممۋنيتەت قالىپتاسپاي، قورعانسىز قالدى. ال بىزدە ۇجىمدىق يممۋنيتەت جاقسى قالىپتاستى. بۇل، ارينە، ءبىزدىڭ ەلدە ەشكىم كوروناۆيرۋس جۇقتىرمايدى دەگەندى بىلدىرمەيدى. تەك جاعداي قىتايداعىدان قاراعاندا جەڭىل وتەتىن بولادى"، دەدى الماز شارمان.