توتەنشە جاعداي مينيسترلىگى قازاۆياقۇتقارۋ ۇشاعى اپاتىنان امان قالعان ەكى ادامنىڭ جاعدايى ورتاشا اۋىر ەكەنىن حابارلادى.
مينيسترلىكتىڭ رەسمي وكىلى رۋسلان يمانقۇلوۆتىڭ ايتۋىنشا، قازاۆياقۇتقارۋ ينجەنەرى س.ششەگلوۆ پەن "قازترانسويل" اق جەلىلىك قۇبىرجولشىسى س.ەرعالييەۆ باس سۇيەك-مي زاقىمىن الىپ، ەكەۋىنىڭ دە ميى شايقالعان. ناۋقاستاردىڭ ءومىرى ءۇشىن ورالداعى كوپسالالى نەيروحيرۋرگيا ورتالىعىنىڭ ماماندارى كۇرەسىپ جاتىر. ولاردىڭ جاعدايى ورتاشا اۋىر ەكەنى حابارلاندى.
كەشە ساعات 15:38-دە ورال قالاسىنان 54 شاقىرىم جەردەگى بايتەرەك اۋدانى چاپۋرينو كەنتىنىڭ اشىق اۋماعىندا "اتىراۋ-ورال-اتىراۋ" باعىتى بويىنشا ۇشقان توتەنشە جاعدايلار مينيسترلىگىنە قاراستى قازاۆياقۇتقارۋ مەكەمەسىنىڭ تىكۇشاعى اپاتتىق جاعدايدا قونىپ، سالدارىنان قازاۆياقۇتقارۋ قىزمەتىنىڭ ءتورت قىزمەتكەرى قازا تاۋىپ، ەكى ادام زارداپ شەككەن.
قازا تاپقاندار اراسىندا اۋە كەمەسىنىڭ كومانديرى دوۆلەتباي قاناتوۆ، ەكىنشى ۇشقىش ۆلاديمير افاناسيەۆ، بورت مەحانيگى سيازبەك اندوسوۆ جانە ينجەنەر جاردەم دوسقالييەۆ بار. بورتتا 5 ەكيپاج مۇشەسى جانە "قازترانسويل" اق-نىڭ 1 وكىلى بولعان.
پىكىر قالدىرۋ