جامبىل وبلىسى ت.رىسقۇلوۆ اۋدانىنىڭ پروكۋراتۋراسى قۇلان-ەنەرگو جىلۋ شجق كمك باس ەسەپشىسىنىڭ 7 ميلليون تەڭگە جىمقىرۋ فاكتىسىن انىقتاعان.
اۋدان پروكۋراتۋراسى قۇلان-ەنەرگو جىلۋ شجق كمك قىزمەتى بيۋدجەت قاراجاتىن قالاي جۇمساعانىنا تالداۋ جۇرگىزدى. تالداۋ بارىسىندا كاسىپورىننىڭ باس ەسەپشىسىنىڭ تولەم تاپسىرمالارىمەن 7 ملن تەڭگە كولەمىندەگى بيۋدجەت قاراجاتىن ءوزىنىڭ كارتوچكالىق شوتتارىنا اۋدارعانى انىقتالدى.
ول ءوزىنىڭ قىلمىستىق ارەكەتتەرىن جاسىرۋ ماقساتىندا تولەم تاپسىرمالارىنىڭ باعانىنا تاۋارلار، كاسىپتىك، عىلىمي جانە تەحنيكالىق قىزمەت ءۇشىن تولەم جاسالدى دەپ كورسەتكەن.
اۋداندىق سوتتىڭ 23 ماۋسىمداعى ۇكىمىمەن كاسىپورىننىڭ باس ەسەپشىسى قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىلىپ، وعان 3 جىل مەرزىمگە باس بوستاندىعىن شەكتەۋ تۇرىندەگى جازا تاعايىندالدى.
سونداي-اق كوممەرسيالىق جانە وزگە دە ۇيىمداردا 3 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرۋ تۇرىندەگى قوسىمشا جازا بار.
ۇكىم زاڭدى كۇشىنە ەندى. زاڭسىز اۋدارىلعان اقشا مەملەكەتكە تولىق كولەمدە قايتارىلدى.
پىكىر قالدىرۋ