ءقازىر فرانسيادى جۇرگەن مۇحتار ءابليازوۆتىڭ سىبايلاسى ءارى ناعاشى اعاسى قۋانىش نۇرعازين ءوز ەركىمەن ەلگە ورالدى. ايتۋىنشا، جيەنى ءۇشىن 12 جىل بويى شەتەلدە جاسىرىنۋعا ءماجبۇر بولعان، دەپ حابارلايدى Almaty.tv.
2007 جىلى مۇحتار ءابليازوۆ قۋانىش نۇرعازيندى BSC كومپانياسىنىڭ نومينالدى ديرەكتورى ەتىپ تاعايىنداعان. باس پروكۋراتۋرانىڭ مالىمەتىنشە، ءابليازوۆ پەن ونىڭ سىبايلاستارى وسى كومپانيانى زاڭسىز نەسيەلەندىرۋ ارقىلى بتا بانكتەن اسا ءىرى كولەمدە قاراجات جىمقىرعان.
قۇزىرلى ورگان وكىلدەرى نۇرعازين سول كەزدە بۇل ىسكە قاتىسى بولا تۇرا ەشقايدا كەتپەۋ تۋرالى مىندەتتەمەنى بۇزىپ، قىلمىستىق جاۋاپتان جالتارۋ ءۇشىن سوتتان جاسىرىنعانىن ايتادى. نۇرعازين وسىلايشا 2012 جىلى قازاقستاننان ليتۆاعا كەتىپ، وزگە ەلدە 12 جىل بويى بوسقىن مارتەبەسىمەن جۇرگەن.
"2007-2009 جىلدار ارالىعىندا BSC كومپانياسىنىڭ ديرەكتورى بولدىم. BSC كومپانياسى 152 ملن تەڭگە نەسيە العان. ماعان نەسيە العاندا سىبايلاس بولدىڭ دەپ ايىپ تاعىلىپ وتىر"، – دەدى كۇدىكتى 73 جاستاعى قۋانىش نۇرعازين.
سوت قۋانىش ءنۇرعازيندى مۇحتار ءابليازوۆتىڭ سىبايلاسى دەپ تانىپ، ونىڭ ۇستىنەن بولەك قىلمىستىق ءىس قوزعايدى. BSC كومپانياسىنىڭ ديرەكتورى قىزمەتىندە عانا تىركەلگەن ول ءىستىڭ وسىلايشا ناسىرعا ۇلاسىپ كەتەرىن بىلمەگەنىن ايتتى.
"مەن ىزدەۋدە جۇرگەنىمدى بىلگەن جوقپىن. 2014 جىلى اۋرۋحانادان شىعىپ كەلە جاتقانىمدا پوليسيا ۇستادى. سول كەزدە ءتۇسىندىم. ماعان "بوسقىن" دەگەن اتاق بەردى. وسى ۋاقىتقا دەيىن ليتۆادا بولدىم، – دەدى نۇرعازين.
وزگە ەلدە ءجۇرىپ، ونىڭ دەنساۋلىعى كۇرت ناشارلاعان. بىرنەشە كۇردەلى وتا جاساعان. سوزىلمالى اۋرۋعا شالدىققان. ال سوڭعى 5 جىلدا جيەنىمەن بايلانىسى ۇزىلگەندىكتەن، قارجىلاي قولداۋ دا بولماعان كورىنەدى.
"مەنىڭ 12 جىل ءومىرىم جيەنىم ءۇشىن شەتەلدە ءوتتى. ول جەردە ەسەپتە تۇردىم. جىلىنا ەكى رەت اۋرۋحاناعا جاتتىم. دەنساۋلىعىما بايلانىستى كوپ وزگەرىس بولدى. جۇرەكتەن ەكى رەت ينفاركت الدىم. بۋىندارىمدى اۋىستىردى، ەكى يىعىم جىعىلعاننان ءۇزىلىپ كەتىپ، تىكتىردىم. شەتەلدە وتكەن ءومىرىم سول بالاعا بايلانىستى بولدى"، – دەدى كۇدىكتى قۋانىش نۇرعازين.
ارادا وسىنشا ۋاقىت وتكەننەن كەيىن نۇرعازين وتانىنا ءوز ەركىمەن كەلۋدى ۇيعارىپتى. ول قازاقستانعا كەلۋ ءۇشىن ليتۆانىڭ ساياسي قامقورلىعىنان دا باس تارتقان.
ونىڭ ەلگە قايتۋىنا قازاقستانداعى دەموكراتيالىق وزگەرىستەر سەبەپ بولعان. ەندىگى ءومىرىن تۋعان جەرىندە بالالارى مەن نەمەرەلەرىنىڭ قاسىندا وتكىزۋدى جوسپارلاپ وتىر.
"ەشقاشان ساياساتقا ارالاسپادىم. مەن وعان "سەن ارالاس، ارالاسپا" دەپ ايتا المايمىن. ول مەنى تىڭدامايدى. مەنىڭ ەركىم وزىمدە. جاڭا قازاقستان دەپ جاتىر عوي، دەموكراتيالىق وزگەرىستەر بولادى دەپ سەنەمىن. سوندىقتان ەلگە، جۇرتقا قايتۋدى شەشتىم. مەن شەتەلدە جۇرگەن قاشقىندارعا سوتتىڭ ءادىل شەشىمى بولاتىنىن ايتقىم كەلەدى. "وتان وتتان دا ىستىق". سوندىقتان قايتۋ كەرەك دەپ ەسەپتەيمىن"، – دەدى قۋانىش نۇرعازين.
ايتا كەتەرى، قۋانىش نۇرعازين 2023 جىلى 24 شىلدەدە ۇشاقپەن ليتۆادان ستامبۋل ارقىلى الماتى حالىقارالىق اۋەجايىنا كەلىپ قونادى. اۋەجايدان تۇسە سالا، ول ۇستالىپ، ۋاقىتشا ۇستاۋ يزولياتورىنا قامالادى. ءقازىر سوت شەشىمىمەن 2 اي مەرزىمگە ءۇيقاماققا اۋىستىرىلدى.
تەرگەۋ امالدارى جالعاسىپ جاتىر. الداعى ۋاقىتتا سوت تالقىلاۋى قايتا باستالادى. ەندى ونىڭ قانداي جازا ارقالايتىنىن سوت ايقىندايدى.
