قارجى مونيتورينگى اگەنتتىگى قوستاناي وبلىسىندا اشكەرەلەنگەن قىلمىستىق توپتىڭ 2022 جىلدان باستاپ ەت ساتۋ بويىنشا جالعان مالىمەتتەر ارقىلى بيۋدجەت قاراجاتىن جىمقىرىپ كەلگەنىن انىقتادى.
جىمقىرىلعان قاراجات 1،6 ملرد تەڭگەدەن اسادى
"ۇيىمداسقان توپتى ءىرى ەت وڭدەۋ كاسىپورنىنىڭ ديرەكتورى باسقارعان، ونىڭ قۇرامىنا قاراماعىنداعىلار، شارۋا قوجالىقتارىنىڭ باسشىلارى، مال دارىگەرلەرى مەن لاۋازىمدى تۇلعالار بار. قىلمىستىق سحەما شارۋا قوجالىقتارىنىڭ قايتا وڭدەۋ زاۋىتىنا جوق ونىمدەردى، سونداي-اق قىلمىستىق توپ مۇشەلەرى اراسىندا بولىنگەن سۋبسيديالار العان ارتىق سالماعى بار ونىمدەردى جەتكىزۋدەن تۇردى"، - دەلىنگەن حابارلامادا.
ءقازىر ۇيىمداسقان قىلمىستىق توپ مۇشەلەرىنە قاتىسى بار 50-دەن استام شارۋا قوجالىعى انىقتالعان. بۇگىنگى تاڭدا الاياقتىق، ۇيىمداسقان توپ قۇرۋ جانە باسقارۋ فاكتىلەرى بويىنشا ون جەتى قىلمىستىق ءىس تىركەلدى.
"توپ مۇشەلەرىنىڭ بانك ۇياشىقتارىندا جانە ەسەپشوتتارىندا شەتەل جانە ۇلتتىق ۆاليۋتاداعى جالپى سوماسى 3 ملن استام اقش دوللارى بار ەكەنى انىقتالدى. الدىن الا تەرگەۋ بارىسىندا قوجالىق باسشىلارى كىناسىن مويىنداپ، 62 ملن تەڭگەدەن استام قارجىنى ءوز ەركىمەن مەملەكەت كىرىسىنە قايتارعان. تەرگەۋ بارىسىندا ۇيىمداسقان قىلمىستىق توپتىڭ 5 بەلسەندى مۇشەسى قاماۋعا الىندى"، - دەلىنگەن حابارلامادا.
پىكىر قالدىرۋ