قازاقستاندا قايتارىلعان اكتيۆتەردى باسقاراتىن كومپانيا قۇرۋ جوسپارلانىپ وتىر.
ۇكىمەت قاۋلىسىنىڭ جوباسى "اشىق نقا" پورتالىندا جاريالاندى.
"جارعىلىق كاپيتالىنا مەملەكەت 100 پايىز قاتىساتىن "قايتارىلعان اكتيۆتەردى باسقارۋ كومپانياسى" جاۋاپكەرشىلىگى شەكتەۋلى سەرىكتەستىگى قۇرىلسىن"، - دەلىنگەن قاۋلى جوباسىندا.
سەرىكتەستىكتىڭ نەگىزگى ماقساتىنا "زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى" قازاقستان رەسپۋبليكاسىنىڭ زاڭىندا جانە باسقا دا زاڭدار مەن نورماتيۆتىك-قۇقىقتىق اكتىلەردە بەلگىلەنگەن تارتىپپەن قايتارىلعان اكتيۆتەردى باسقارۋ، ساقتاۋ، وتكىزۋ جۇمىستارى كىرەدى.
"مەملەكەتكە قايتارىلعان اكتيۆتەردى ونىڭ اتىنان مەنشىككە الۋ، مەملەكەت كىرىسىنە اينالدىرىلعان اكتيۆتەردىڭ ساقتالۋىن قامتاماسىز ەتۋ جانە كۇتىپ ۇستاۋ، اكتيۆتەرگە يەلىك ەتۋ، ارنايى مەملەكەتتىك قورعا اكتيۆتەردى ساتۋدان تۇسكەن قاراجاتتى اۋدارۋ باسقارۋشى كومپانيانىڭ مىندەتتەرىنە جاتادى"، - دەلىنگەن قۇجاتقا تۇسىندىرمە جازبادا.
جوبانى جۇزەگە اسىرۋعا رەسپۋبليكالىق بيۋدجەتتەن قاراجات ءبولۋدىڭ قاجەتى جوق.
ەسكە سالايىق، 12 شىلدەدە قازاقستان پرەزيدەنتى قاسىم-جومارت توقايەۆ "زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى" زاڭعا قول قويعان بولاتىن.
پىكىر قالدىرۋ