2 تامىزدا پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين مەن اۋعانستاننىڭ ساۋدا جانە ونەركاسىپ ءمينيسترى الحادج نۇريددين ازيزي ىنتىماقتاستىقتىڭ نەگىزگى اسپەكتىلەرىن تالقىلادى. 

سەرىك جۇمانعارين ءساۋىر ايىندا كابۋلعا ساپارى كەزىندە تاراپتار ەلدەر اراسىنداعى تاۋار اينالىمىنىڭ كولەمىن $1 ملرد-تان $3 ملرد-قا دەيىن ۇلعايتۋ مىندەتىن قويعانىن اتاپ ءوتتى.

"قازاقستاندىق كومپانيالاردىڭ كابۋلعا سوڭعى ساپارىنىڭ قورىتىندىسى بويىنشا ءبىزدىڭ ەنەرگەتيكالىق سۋسىندارىمىز، ۇن ونىمدەرى، مينەرالدى تىڭايتقىشتاردىڭ العاشقى جونەلتىلىمى بولدى، كۇنباعىس مايىنا دا قىزىعۋشىلىق بار. اۋعانستاننان يمپورتتا اۋىلشارۋاشىلىق ونىمدەرىمەن قاتار توقىما بۇيىمدارى پايدا بولدى. بەلسەندىلىك تانىتاتىن جۇمىس باعىتىمىز بار"، — دەدى سەرىك جۇمانعارين.

ال اۋعانستان ءمينيسترى قازاقستاننىڭ گۋمانيتارلىق كومەگىنە قاتىستى ءوز پىكىرىن ايتتى.

"ءبىز قازاقستان پرەزيدەنتىنە، قازاقستان ۇكىمەتىنە العىس ايتىپ جاتىرمىز. قازاقستاننىڭ گۋمانيتارلىق سالاداعى قولداۋىن جوعارى باعالايمىز. ءبىز ساۋدا سالاسىنداعى بايلانىستارعا، وسىعان دەيىنگى اۋعان حالقىنا جاسالعان كومەككە ريزامىز"، - دەدى نۋريددين ازيزي.

سونداي-اق ىنتىماقتاستىقتى جانداندىرۋ ءۇشىن اۋعان تاراپىنا گەرات قالاسىنداعى قازاقستاننىڭ ساۋدا ءۇيىنىڭ الەۋەتىن پايدالانۋ جانە قازاقستاندا ءوزىنىڭ ساۋدا وكىلدىگىن اشۋ ۇسىنىلدى.

"قازاقستان وتاندىق كومپانيالاردىڭ اۋعانستاندا، اسىرەسە كولىك، تاۋ-كەن، تەلەكوممۋنيكاسيا جانە اۋىل شارۋاشىلىعى سالالارىندا ىسكە اسىرىلاتىن باسقا دا ەكونوميكالىق جوبالارعا قاتىسۋىن قاراستىرۋدا. اتاپ ايتقاندا، بيىل ءساۋىر ايىندا قازاقستاندىق دەلەگاسيانىڭ كابۋلعا ساپارىنان كەيىن «قازاقتەلەكوم» اق اۋعانستانعا كوممەرسيالىق نەگىزدە تالشىقتى-وپتيكالىق ينتەرنەتتى جەتكىزۋگە اۋعان تاراپىمەن كەلىسىمشارتقا قول قويدى. قازاقستان مەن اۋعانستان ءبىلىم بەرۋ باعىتىندا دا ىنتىماقتاسادى. بۇگىندە ءال-فارابي اتىنداعى قازۇۋ اۋعانستاننىڭ 130 ستۋدەنتى ءبىلىم الۋدا. سەرىك جۇمانعارين قىزىعۋشىلىق تانىتقان جاعدايدا قازاقستاندا اۋعانستاننان كەلگەن ستۋدەنتتەردىڭ سانىن كوبەيتۋدى ۇسىندى”، – دەلىنگەن ۇكىمەت حابارلاماسىندا.